Jo pa Jehovah Gimaro Kit ma Atir

1. Atematema ango ma Yucepu okato ki iye, dok en odok iye nining?

WOD pa Yakobo ma nyinge Yucepu okato ki i atematema magwar. Dako mo owacce ni, “Wabut kwedi.” Dako meno onongo obedo dako pa ladit ticce ma nyinge Potipar. Yucepu okwero lajwac tamme meno. Ngat mo i kare-ni twero pennye ni, ‘Pingo Yucepu okwero atematema man?’ Potipar onongo kome pe gang. Medo i kom meno, Yucepu onongo obedo opii i gang meno; dako-ni onongo biweko kwone bedo tek adada ka en pe obuto kwede. Kadi bed kit meno, Yucepu pud omedde ki kwero tam pa dako-ni nino ducu. Pingo? Yucepu owaco ni: “An dok acore ka tiyo bal madit marac kuman nining, kun atimo wa bal i kom Lubanga kulu?”—Acak. 39:7-12.

2. Yucepu ongeyo nining ni abor obedo bal i nyim Lubanga?

² Yucepu ongeyo nining ni Lubanga neno abor calo “bal madit marac”? Cik pa Moses ma tye iye cik ni “Pe itim abor,” kicoyo mwaki miya aryo lacen. (Nia 20:14) Kadi bed kit meno, Yucepu onongo ngeyo Jehovah maber dok oniang ni En pe cwako tim me abor. Me labolle, Yucepu onongo ngeyo ni Jehovah oyubo ni nyom obed i kin laco acel ki dako acel. Dok en onongo owinyo kit ma Jehovah tyen aryo kulu, ogwoko kwede daa wonne Cara wek obed lagen bot cware i kare ma laco mukene mito buto kwede. I yo acel-lu, Lubanga bene onongo ogwoko dako pa Icaka, ma nyinge Labeka. (Acak. 2:24; 12:14-20; 20:2-7; 26:6-11) I kare ma Yucepu olwodo jami magi, en oniang gin ma atir ki gin marac i wang Lubanga. Pien Yucepu onongo maro Lubangane, en omoko tamme me timo gin ma en ngeyo ni Jehovah mito ni etim.

3. Gin ango ma wabinyamo i pwony man?

³ Tika imaro kit ma atir? Labongo akalakala mo, imaro. Ento wan ducu watye ki roc, dok ka pe wagwokke ci kit ma lobo neno kwede kit ma atir twero gudowa. (Ic. 5:20; Rom. 12:2) Pi meno wabinyamo gin ma kit ma atir obedo ki adwogi maber ma wanongo ka wamaro kit ma atir. Lacen wabinyamo jami adek ma watwero timo me konyowa jingo marwa pi rwom me kwo ma atir pa Jehovah.

KIT MA ATIR OBEDO GIN ANGO?

4. Tam marac ango ma jo mapol gitye kwede i kom kit ma atir?

⁴ Pol kare ka dano gutamo i kom ngat ma kite atir, gitamo i kom ngat ma lawakke, ngat ma neno jo mukene ki wang me cac, dok kite atir mukato kare woko. Ento Lubanga pe maro kit macalo meno wa acel. I kare ma Yecu tye i lobo, en oloko matek i kom lutela dini ma i karene ma onongo giketo cik ma megi me rwom me kit ma atir. (Latit. 7:16; Luka 16:15) Ngat ma timo gin ma Jehovah owaco ni tye atir pe tamo ni eber eloyo jo mukene.

5. Ma lubbe ki Baibul, kit ma atir obedo gin ango? Mi labol.

⁵ Kit ma atir obedo kit mamwonya adada. I yo macek, obedo timo gin ma atir i wang Lubanga Jehovah. I Baibul, nyig lok ni ‘kit ma atir’ kwako lubo rwom me kwo ma tye lamal loyo ducu—ma en aye rwom me kwo ma atir pa Jehovah. Me labolle, Jehovah omiyo cik ni lucatwil guti ki “kidi lapim pek pa jami maberre.” (Nwo. 25:15) Nyig lok me leb Ibru ma kigonyo kany ni “maberre” bene kitwero gonyone ni “ma atir.” Pi meno, ka Lakricitayo mito bedo ngat ma kite atir i wang Lubanga ci omyero en otim jami ma atir i biacarane ducu. Ngat ma kite atir bene maro ngolo kop atir—en dag neno ka kitero jo mukene marac. Dok ‘me yomo cwiny Jehovah maber,’ ngat ma kite atir tamo matut i kom kit ma tamme bigudo kwede Jehovah.—Kol. 1:10.

6. Pingo watwero geno rwom me gin ma atir ki gin marac pa Jehovah? (Icaya 55:8, 9)

⁶ Baibul tito ni Jehovah obedo Wang It me kit ma atir. Pi meno, kilwonge ni “kabedo me kit atir.” (Jer. 50:7, NWT) Macalo Lacwec, Jehovah kene aye tye ki twero me moko gin ma atir ki gin marac. Pien watye ki roc dok watimo bal, pe watwero ngeyo gin ma atir nyo marac. Ento Jehovah pe ki roc, dong en ngeyo gin ma atir ki gin marac kare ducu. (Car. 14:12; kwan Icaya 55:8, 9.) Kadi bed kit meno, pien kicweyowa i cal pa Lubanga, watwero kwo ma lubbe ki rwomme me kit ma atir. (Acak. 1:27) Dok wamaro timo meno. Marwa pi Wonwa tugo cwinywa me lubo lanenne kit ma watwero kwede.—Ep. 5:1.

7. Pingo wamito rwom me gin ma atir ma genne? Mi lapor.

⁷ Wanongo adwogi maber ka watute me lubo rwom me gin ma atir ki gin marac ma Jehovah oketo. Tika itwero neno pingo man pire tek? Go kong gin ma twero timme ka beng acel acel oketo cik ma meggi me moko dit nyo tidi pa cente. Man onongo bikelo anywenanywena madwong adada. Dok ket kong ni, ludaktar kacel ki nac onongo pe gilubo cik me yotkom ka gitye ka tic i kom latwo, man onongo twero neko latwo woko. Labongo akalakala mo, ka dano tye ki cik me timo jami, man gwokowa. I yo acel-lu, rwom me gin ma atir ki gin marac ma Lubanga oketo gwokowa.

8. Mot ango ma tye ka kuro jo ma gimaro timo gin ma atir?

⁸ Jehovah goyo laane i kom jo ma gitute me lubo rwom me kwo ma en oketo. En ocikke ni: “Jo ma kitgi atir gibicamo lobo, dok gibibedo iye matwal.” (Jab. 37:29) Tika itwero goyo i wi kit ma dano bibedo ma gunote, ki kuc kacel ki yomcwiny ka gin ducu gilubo rwom pa Jehovah? Jehovah mito ni inong mit pa kwo ma kit meno. Wan ducu watye ki tyen lok maber me maro gin ma Jehovah owaco ni tye atir! Watwero jingo marwa pi kit mamwonya man nining? Kong dong wanyamu jami adek ma watwero timone.

JING MARRI PI RWOM ME KWO MA JEHOVAH OKETO

9. Ngo ma bikonyowa wek wamar kit ma atir?

⁹ Gin me 1: Mar Ngat ma oketo rwom meno. Ka wamito ni wamar kit ma atir, mitte ni wadong marwa pi Ngat ma oketo rwom me gin maber ki gin marac. Ka marwa pi Jehovah woto ki dongo, ci mitiwa me kwo ma lubbe ki cikke bene bidongo. Me labolle: Ka Adam ki Kawa onongo gumaro Jehovah, ci onongo gibilubo cikke.—Acak. 3:1-6, 16-19.

10. I yo ma nining ma Abraim odongo kwede ngecce i kom Jehovah?

¹⁰ Labongo akalakala mo, wan bene pe wamito ni watim bal acel-li ma Adam ki Kawa gutimo. Watwero gwokke ki timo meno ka wamedde ki pwonyo lok i kom Jehovah, ka wamedde ki bedo ki pwoc pi kite mabeco, kun bene watute me niang kit ma en tamo kwede. Ka watimo man, marwa pi Jehovah bidongo. Tam kong i kom Abraim. En onongo maro Jehovah adada. Kadi wa i kare ma onongo tek adada me niang tam pa Jehovah, Abraim pe ojemo. Me ka meno, en otute me ngeyo Jehovah maber. Me labolle, i kare ma en oniang ni Jehovah omoko tamme me jwero Codom ki Gomora, i acakkine Abraim obedo ki lworo ni “Langolkop me lobo ducu” bityeko jo ma kitgi atir kacel ki jo maraco. Ki tung bot Abraim, meno onongo gin marac adada, pi man, ki mwolo madit en openyo Jehovah ki lapeny mapol. Jehovah odiyo cwinye dok ogamo lapeny magi ducu. I agikkine, Abraim oniang ni Jehovah neno cwiny dano ducu dok ni En pe pwodo ngat ma balle pe kacel ki labalo.—Acak. 18:20-32.

11. Abraim onyuto nining ni emaro dok egeno Jehovah?

¹¹ Lok ma Abraim oloko ki Jehovah i kom boma me Codom ki Gomora ogude adada. Labongo akalakala mo, en odongo mare kacel ki woro pi Wonne loyo kit macon. Ento mwaki mogo lacen, Abraim okato ki i gin mo ma oweko obedo tek adada bote me nyuto ni egeno Jehovah. Jehovah owacce ni otyer wode me amara Icaka. I kare man Abraim onongo ngeyo Lubangane maber adada, pi meno en pe dong openyo Jehovah ki lapeny mo. Abraim oa ci ocako timo gin ma Jehovah owacce ni otim. Kadi bed kit meno, go kong arem cwiny ma en okato ki iye i kare ma tye ka yubbe me tiyo tic man! Abraim nen calo olwodo matut gin ma en opwonyo i kom Jehovah. En onongo ngeyo ni Jehovah pe bitimo gin mo ma pa atir nyo ma pe nyuto mar. Ma lubbe ki i lok pa lakwena Paulo, Abraim tamo ni Jehovah bicero wode me amara Icaka woko. (Ibru 11:17-19) Con onongo Jehovah ocikke ni lutino pa Icaka bidoko rok madit, dok i kare meno Icaka onongo pud pe ki latin mo. Abraim onongo maro Jehovah adada, pi meno en ogeno Wonne ni bitimo gin ma atir. Ki niye madit en otimo gin ma kiwacce ni otim.—Acak. 22:1-12.

12. Watwero lubo lanen pa Abraim nining? (Jabuli 73:28)

¹² Watwero lubo lanen pa Abraim nining? Calo en, wan bene omyero wamedde ki pwonyo lok i kom Jehovah. Ka wawoto ki timo man, wabinyikke cok kwede dok marwa pire bimedde. (Kwan Jabuli 73:28.) Wabipwonyo cwiny ma ngoliwa kop me lubo tam pa Jehovah. (Ibru 5:14) Dok macalo adwogine, ka ngat mo owacciwa ni watim gin marac wabikwero woko lajwac. Wabikwero tam i kom timo gin mo ma bicwero cwiny Wonwa dok ma twero balo watwa kwede. Ngo mukene ma watwero timo me nyuto ni wamaro kit ma atir?

13. Watwero keto cwinywa me dongo kit ma atir nining? (Carolok 21:21)

¹³ Gin me 2: Tute matek me dongo mar pi kit ma atir nino ducu. Watwero dongo marwa pi rwom me kit ma atir pa Jehovah i kit i yo acel ma wajingo kwede komwa ka waryeyo ler kare ki kare. Man obedo tic ma itwero timone i kwoni me nino ducu. Jehovah obedo ngat ma niang dok en pe mito ni watim gin makato kerowa woko. (Jab. 103:14) Jehovah otitiwa ni emaro ngat kare ducu ‘bedo ki lengcwinye.’ (Kwan Carolok 21:21.) Ka watye ka yelle me cobo yub mo i ticwa pi Jehovah, pol kare watute matek me cobone. Tye bene kit meno ka waketo cwinywa i bedo ngat ma kite atir. Dok Jehovah bidiyo cwinye kun konyowa me dongo kit man motmot.—Jab. 84:5, 7.

14. ‘Nyonyo me gengo kor’ obedo ngo, dok pingo pire tek?

¹⁴ I yo me mar, Jehovah poyo wiwa ni timo gin ma atir pe nurowa. (1 Jon 5:3) Me ka meno, gwokowa, dok man obedo gin ma wamito nino ducu. Wi opo i kom jami aruka me lweny ma lakwena Paulo otito pire. (Ep. 6:14-18) Bute mene ma gwoko adunu pa lamony? Obedo ‘nyonyo me gengo kor’ ma man obedo rwom me kit ma atir ma Jehovah oketo. Kit macalo nyonyo me gengo kor gwoko adunu pa lamony weko pe kicobo, kit ma atir bene gwokowa wek jami maraco me lobo man pe obal cwinywa nyo ngat ma wabedo. Man aye oweko pire tek ni waruk nyonyo me gengo kor!—Car. 4:23.

15. Itwero ruko nyonyo me gengo kor nining?

¹⁵ Itwero ruko nyonyo me gengo kor nining? Itwero timo man ki tam i kom gin ma Lubanga mito ni itim ka imoko tammi nino ducu. Ka watye ka moko tamwa i kom ngo ma wabiwaco, wer ma wabiwinyo, galowang mene ma omyero wayer, nyo buk mene ma omyero wakwan, bedo ber ka wapennye kekenwa ni: ‘Ngo ma abibedo ka pito ki cwinya? Tika Jehovah bicwako gin ma ayero? Nyo kece gin man cwako tim tarwang, tim gero, woro me jami—jami ma Jehovah neno ni obedo jami maraco?’ (Pil. 4:8) Ka iyero me timo jami ma Jehovah cwako, ibigwoko cwinyi ki i gin marac.

16-17. Icaya 48:18 cuko cwinywa nining ni watwero medde ki kwo kun walubo rwom me kit ma atir pa Jehovah kare ducu?

¹⁶ Tika i kare mogo iparo ka ce ibimedde ki kwo ma lubbe ki rwom me kit ma atir pa Jehovah nino ki nino, mwaka ki mwaka? Nen kong lapor man ma Jehovah otiyo kwede i Icaya 48:18. (Kwan.) Jehovah ocikke ni kitwa ma atir bibedo “calo nam ma piine mol labongo yweyo-ni.” Go kong ni itye icung i dog nam madit, dok itye ka neno kit ma piine twagge kwede labongo yweyo. Ka itye ka ma piny opye iye mot kit meno, tika ibibedo ka paro ka ce nino mo twagge pa pii man bigik woko? Ngene kene ni pe! Ingeyo ni pii dong obedo ka twagge i dog nam man pi mwaki alip mapol, dok pud bimedde ki twagge.

¹⁷ Kiti ma atir twero bedo calo twagge pa pii me nam! Man twere nining? Ka itye ki tam me amoka, mukwongo kong itam i kom gin ma Jehovah mito ni itim, ci itim. Kadi bed timo meno tek nining, Woru ma lamar-ri kare ducu bibedo tye me mini kero kun konyi wek itim gin ma atir nino ducu.—Ic. 40:29-31.

18. Pingo omyero wagwokke ki ngolo kop i kom jo mukene ma lubbe ki rwomwa?

¹⁸ Gin me 3: Wek Jehovah aye omok ka gin ma jo mukene timo tye atir nyo pe. Ka watute ki kerowa ducu me kwo ma lubbe ki rwom me kit ma atir pa Jehovah, omyero wagwokke ki ngolo kop i wi jo mukene wek pe wabed jo ma kitgi atir mukato kare. Me ka neno jo mukene ki wang me cac calo watye ki twero me ngoligi kop ma lubbe ki rwomwa, omyero wiwa opo ni Jehovah aye “Langolkop me lobo ducu.” (Acak. 18:25) Jehovah pe omiyo twero meno botwa. Ki lok ada, Yecu ociko ni: “Pe wungol kop i kom jo mukene, wek wun bene pe kingol kop i komwu.”—Mat. 7:1.b

19. I yo ma nining ma Yucepu onyuto ni egeno ngolo kop pa Jehovah?

¹⁹ Kong dok wanenu labol pa laco ma kite atir ma nyinge Yucepu. En ogwokke ki ngolo kop i kom jo mukene kadi bed onongo gutere marac. Omegine kikome gutere marac, gucate macalo opii, ci gubwolo wongi ni Yucepu oto woko. Mwaki mapol lacen, Yucepu oribbe kacel ki jo ganggi. I kare man, Yucepu onongo dong tye laloc ma tye ki twero madwong dok onongo twero ngolo kop i kom omegine kun bene culo kwor. Omegi Yucepu gubedo ki lworo ni en bingolo kop i komgi, kadi bed onongo gungut ki cwinygi ducu pi gin ma gutimo. Ento Yucepu ocuko cwinygi ni: “Pe wulwor, an atye ma ka Lubanga bo?” (Acak. 37:18-20, 27, 28, 31-35; 50:15-21) Ki mwolo, Yucepu oniang ni Jehovah keken aye tye ki twero me ngolo kop i kom omegine.

20-21. Watwero gwokke nining ki bedo jo ma kitgi atir tutwal?

²⁰ Calo Yucepu, waweko ngolo kop i cing Jehovah. Me labolle, pe watamo ni wangeyo jami ducu ma tugo cwiny omegiwa ki lumegiwa me timo jami kit ma gitimo. Wan pe watwero ngeyo jami ma tye i cwiny dano; “[Jehovah] aye neno cwinye ka leng.” (Car. 16:2) En maro dano ducu, kadi gia ki i tekwaro kacel ki kwo mapatpat. Dok Jehovah cuko cwinywa ni ‘wayab cwinywa malac.’ (2 Kor. 6:13) Watute me maro omegiwa ki lumegiwa ducu, dok pe wangolo kop i komgi.

²¹ Man bene tyen lokke ni pe myero wangol kop i kom jo ma pe tye Lucaden. (1 Tem. 2:3, 4) Tika ingolo kop i kom watti mo ma pe laye, kun iwacci, “Laco ni pe bidoko Lacaden matwal”? Ngene kene ni pe, ka itimo meno ci ibinyuto ni in kiti atir tutwal. Jehovah pud tye ka miyo ki “dano ducu” kare me ngut. (Tic 17:30) Kare ducu, wek wi opo ni Jehovah neno jo ma gitamo ni gin kitgi atir tutwal calo jo ma kitgi pe atir.

22. Pingo imoko tammi me maro kit ma atir?

²² Marwa pi jami ma Jehovah waco ni tye atir biweko wabedo ki yomcwiny dok bikonyowa me weko lanen maber bot jo mukene, wek gin bene gumarwa kacel ki Jehovah. Wamedde wunu ki bedo “jo ma kec ki orwo pii nekogi pi bedo jo ma kitgi atir.” (Mat. 5:6) Bed ki gen ni Jehovah neno tuteni dok cwinye yom ka itute me timo gin ma atir. Ka kit pa dano me lobo man woto ki doko rac medde ameda, pe iwek cwinyi otur! Wi opo ni “[Jehovah] maro jo ma kitgi atir.”—Jab. 146:8.