Yub ma Kite Dok Pat me Cako Kwano Baibul ki Dano i Sektemba

I dwe me Sektemba, wabitute matek me cako kwano Baibul ki dano, kun watiyo ki brocuwa me Bed ki Kwo Maber Nakanaka! Lutit kwena gitwero yero me tic macalo painia pi tutunu pi cawa 30. Wabinywako i rwec man ma kite dok pat-ti nining?

• I Lim me Acel: Ti ki lapeny ma i nge brocuwa man me tugo miti pa dano me kwano Baibul, dok temme me nyuttigi kit ma wakwano kwede Baibul ki dano. Wi bene myero opo i kom jo ma gunyuto miti con, kacel ki jo ma idok cen botgi. Kadi bed gukwero kwano Baibul i kare mukato angec, ento pud gitwero bedo ki miti i kom yo me kwano Baibul manyen ma watye ka tic kwede kacel ki brocuwa manyen-ni. Pe myero kiwek brocuwa man i gang ma dano pe iye nyo kiket i waraga bot jo ma pud pe gunyuto miti. Komitti pa Luelda ma Neno Wi Tic me Pwony gitwero keto yub pi jo me kacokke me cito i tic me pwony i nino mukene bene i dwe man.

• Yo Mukene me Pwony: Ka kacokkewu tiyo ki lalor bukke, wutwero keto bene brocuwa me Bed ki Kwo Maber Nakanaka! Tit bot jo ma gunyuto miti i kom brocuwa man ni kitiyo ki brocuwa man me kwano Baibul ki dano me nono. Dok inyutte wiye wiye kit ma wakwano kwede Baibul ki dano, nyo ket yub me nyutte lacen. Laelda ma neno wi tic me pwony twero keto yub pi utmege ma gupore me cito ka tito kwena ki dong cako kwano Baibul ki dano ka ma kitimo iye biacara. Itwero bene cako kwano Baibul ki lutic luwoti nyo jo ma imiyo caden botgi ma onongo pe iyubbe iye.

Yecu ocikowa ni ‘walok dano gudok jo ma lube kun wapwonyogi.’ (Mat 28:19, 20) Walego ni yub man okonywa me cobo tic meno kun watiyo ki Bed ki Kwo Maber Nakanaka!