Ti ki Vidio me Pwonyo Lutino Kwanni

Jami anena konyo dano me keto cwinygi i kom gin ma gitye ka pwonyone-ni. Man konyogi me niang ki po i kom pwony meno. Lapwonywa Madit, Jehovah, otiyo ki jami anena me miyo pwony ma pigi tego. (Acak 15:5; Jer 18:1-6) Lapwony Madit, Yecu Kricito, bene otiyo ki jami anena i pwonye. (Mat 18:2-6; 22:19-21) Gin anena acel ma tye ka kelo adwogi maber adada aye vidio. Tika itiyo ki vidio ka itye ka pwonyo lutino kwanni?

Vidio ma romo gin apar dong kityeko yubogi me konyowa nyamo pwony ma tye i brocuwa me Kwena Maber Mua ki Bot Lubanga! Pol kare, wi lok me vidio magi rwatte ki lapeny acel mo ma kicoyo ki coc ma kikwoto i brocuwa-ni. Brocuwa man ma tye i jw.org bene tye ki link ma poyo wiwa ka omyero wanyut vidio. Medo i kom meno, vidio mukene bene tye i kin Jami Ticwa ma Pigi Tego me Pwony.

Tika wutye ka nyamo pwony mo me Baibul ma twero bedo tek pi latin kwanni me niang iye? Nyo latin kwanni mono tye ka lweny ki peko mo? Yeny vidio mo ma twero konye ki i jw.org® ki JW Broadcasting.® Gwok nyo wutwero neno ci i ngeye wunyamo vidio magi kacel ki latin kwanni.

Dwe ki dwe, kicwalo woko vidio manyen. Ka itye ka nenogi, tam i kom kit ma itwero tic kwedgi ka itye ka pwonyo jo mukene.