‘Paulo Opwoyo Lubanga ci Cwinye Odoko Tek’

I kare ma kacokke ma i Roma guwinyo ni lakwena Paulo tye ka bino, omege mapol guwoto wot i bor piny ma romo mairo 40 (64 km) me rwatte kwede. Cwiny me jalle ma gunyuto-ni ogudo Paulo nining? “Ka Paulo onenogi, opwoyo Lubanga ci cwinye odoko tek.” (Tic 28:15) Kadi bed Paulo onongo ngene pi cuko cwiny kacokke ma en olimogi-ni, ento i wang-ngi ma en tye mabuc, en aye onongo cuko cwiny.​—2Kor 13:10.

I kareni, luneno me adwol giwoto i kacokke ki kacokke me cuko cwiny omege ki lumege. Calo lutic pa Lubanga mukene-ni, i kine mukene gin bene giol, gibedo ki par dok cwinygi tur. Lacen ka laneno me adwol ki dakone gulimo kacokkewu, ngo ma itwero timone me jingo cwinygi, wek ‘wucuku cwinywu kekenwu’?​—Rom 1:11, 12.

• 

  Wot i cokke me cito i tic me pwony. Laneno me adwol nongo cuko cwiny ka lutit kwena gijale wek ginong adwogi maber ki i cabit ma en tye ka limo kwede kacokke meno. (1Tec 1:2, 3; 2:20) Nen ka itwero tic macalo painia pi tutunu i dwe me limone. Tika itwero keto nyingi piny wek iti kacel kwede ki dakone i tic me pwony nyo wucit kacel ka kwan ki latin kwan me Baibul? Cwinygi yom me tic kacel ki lutit kwena mapat pat, kadi wa jo manyen nyo jo ma dirogi me pwony pud nok.

• 

  Jolgi. Tika itwero minigi kabuto nyo cam? Man binyuto bot laneno me adwol ki dakone ni imarogi. Gin pe gimito jami ma rwomme dok lamal tutwal.​—Luka 10:38-42.

• 

  Winy tiragi ci iket i tic. Laneno me adwol marowa dok mito konyowa me yubo ticwa pi Jehovah. I kine mukene, mitte ni en omi tira magwar. (1Kor 5:1-5) Yomo cwinye ka wabedo luwiny.​—Ibru 13:17.

• 

  Nyut pwoc. Wac bot laneno me adwol ki dakone kit ma gukonyi kwede. Itwero wacone atir botgi nyo itwero coyo waraga nyo kad.​—Kol 3:15.