Kwan Baibul ki Dano i Yo ma Nyako Nyige
1. Tic ango ma lutit kwena ma gikwano Baibul ki lutino kwan gitye kwede?
1 Pe tye ngat mo ma twero tic pi Lubanga ka pe Jehovah aye ‘onyikke cok.’ (Jon 6:44) Kadi bed kit meno, lutit kwena ma gikwano Baibul ki lutino kwan myero gutute matek me konyo dano wek gunyikke cok ki Wonwa me polo. (Yak. 4:8) Man mito yubbe maber. Kwano paragraf ki gamo lapeny ma kicoyo piny keken pe romo konyo lutino kwanwa me niang kwena maber wek gudong i yo me cwiny.
2. Kwano Baibul ki dano i yo ma nyako nyige kelo adwogi maber ango?
2 Wek gukwan ki dano i yo ma nyako nyige, lutit kwena myero gukony lutino kwangi me (1) niang gin ma Baibul pwonyo, (2) ye gin ma Baibul pwonyo, ki (3) keto i tic gin ma Baibul pwonyo. (Jon 3:16; 17:3; Yak. 2:26) Twero tero dwe mapol me tiro dano i yo magi. Ento, yo magi konyo latin kwan me dongo watte ki Jehovah ki dong dyere bote.
3. Pingo lupwonye ma gucwiny gipenyo lapeny ma golo tam?
3 Ngo ma Latin Kwan me Baibul Tye ka Tamone?: Me ngeyo ka latin kwan niang dok jolo jami ma en opwonyo, gwokke ki duru lok mapol tutwal dok icuk cwiny latin kwan me tito gin ma tye i tamme. (Yak. 1:19) Tika en niang gin ma Baibul waco i kom pwony ma wutye ka nyamone? Tika en twero tito pwony ma wutye ka nyamone labongo kwano akwana? En winyo nining i kom gin ma en opwonyo? Tika en ye ni gin ma Baibul pwonyo ber? (1 Tec. 2:13) Tika en niang ni gin ma etye ka pwonyone myero ogud kwone? (Kol. 3:10) Me nongo lagam me lapeny magi, omyero wapeny lapeny ma golo tamgi, ci wawiny lagamgi.—Mat. 16:13-16.
4. Ngo ma myero watim ka latin kwanwa nongo ni ye nyo lubo gin ma en tye ka pwonyone ki i Baibul tek?
4 Kit ki tam pa dano pol kare nongo omoko matek dok lokone tero kare malac. (2 Kor. 10:5) Ngo ma myero watim ka latin kwanwa pe ye nyo pe lubo gin ma en tye ka pwonyone? Myero wadi cwinywa wek wami kare muromo pi Lok pa Lubanga ki cwiny mere maleng me loko cwiny latin kwan. (1 Kor. 3:6, 7; Ibru 4:12) Me ka keto lyeto i kome, pol kare bedo ber ka kong waweko pwony me Baibul ma latin kwan nongo ni niang nyo ketone i tic tek. Ka wamedde ki pwonyo en lok me Baibul motmot dok ki mar, ci meno romo tugo cwinye me loko kwone.