Bok Me Lapeny

◼ Ngo ma lutino myero gupwony wek guteggi i yo me cwiny?

Lunyodo ma Lukricitayo gitiyo matek wek ‘gipwony dok ginyeb lutinogi ki kit mabeco ma Jehovah pwoyo.’ (Ep. 6:4) Me laporre, lunyodo mapol dong gunongo adwogi maber ki i ngiyo ginacoya me nino ducu kacel ki lutinogi odiko ki odiko. I otyeno me woro pi jo me ot ki i kare mukene, jo me ot gitwero neno ki nyamo vidio kacel, nyamo Lapeny pa Jo Matino, poro gin mo mutimme i Baibul, nyo poro jami ma timme i kwo. Ento, wek lutino gumedde “anyim ki pwony pa jo muteggi” myero bene gipwonygi ki lok ada matut me Baibul.​—Ibru 6:1.

Tam kong ngo ma wapwonyo bot jo ma warwatte kwedgi i wang ticwa. I limwa mukwongo nyo ka wadok cen ka lim, watute me cako kwano Baibul kwedgi kun watiyo ki buk me Baibul Mono Ada Pwonyo Gin Ango? I nge tyeko kwano buk meno, wakwano ‘Wubed i Mar pa Lubanga.’ Pingo? Pien buk me Baibul Pwonyo miyo bot lutino kwan ngec i kom Ginacoya. Ento buk me ‘Mar pa Lubanga’ pwonyogi kit me keto cik me Baibul i tic i kwogi me nino ducu. Kwano bukke aryo magi konyo jo manyen wek ‘lwitgi odony’ i Kricito dok ‘gucung matek i niye.’ (Kol. 2:6, 7) Bukke magi bene twero kelo adwogi maber bot lutinowa, pe kumeno? Myero kipwonygi bene i kom ginkok, Ker pa Lubanga, ki kit ma jo muto gitye kwede. Lutino myero gunge bene gin mumiyo Lubanga pud oye ni tim maraco omedde dok guniang ni watye ka kwo i kare me agikki. Myero gumok tamgi kengi ni Lucaden pa Jehovah aye gitye ki ada. Jo matino myero guniang cik me Baibul ki kit ma gitwero pwonyo kwede tekogi me “poko gin maber ki gin marac.” (Ibru 5:14) Ngene kene ni lunyodo myero kong gutam i kom mwaka ki kero me niang pa lutinogi. Ento, lutino mapol gitye ki niang muromo ma gitwero pwonyo ada matut me Baibul kadi bed gitino.​—Luka 2:42, 46, 47.