Bok Me Lapeny

◼ Pwony mene me Baibul ma kiromo tic kwede ka odok i kom tic ki cim cing, ka watye i tic me pwony nyo i cokke?

“Kit Tim Acel Acel Tye ki Karene” (Latit. 3:1): Cim cing konyo dano me cwalo mesej nyo lok ki jo mukene i cawa mo keken. Ento, i kare mukene Lakricitayo pe mito ni cim owir tamme. Me labolle, cawa me cokkewa obedo cawa me woro Jehovah, nongo pwony ki bote, ki me cuko cwinywa kekenwa. (Nwo. 31:12; Jab. 22:22; Rom. 1:11, 12) Tika watwero neko cimwa woko ka watye i cokke, ci wacwinyo lacen i nge cokke? Ka gwok mitte ni pe wanek cimwa pi peko mo, ci bedo ber ka waketo i dwan ma pe twero yelo jo mukene.

Tim Jami Ducu “Pi Lok me Kwena Maber.” (1 Kor. 9:23): I kine mukene, watye ki tyen lok maber me tic ki cim ka watye i ticwa me pwony. Me labolle, omege ma gin lutel wi tic giromo tic ki cim me roto jo ma gitye i kabedo mukene me wang tic. Kare mukene lutit kwena giromo tic ki cim me lok ki dano ma onyuto miti nyo lutino kwan me Baibul ma nongo peya gucito botgi, tutwalle ka ngat moni bedo ka mabor. Ka watye ki cim cing, myero wagwokke wek pe ongol lokwa ki rwod ot. (2 Kor. 6:3) Ka watye ka kuro lutit kwena mukene, ma ka bedo ka goyo cim nyo cwalo mesej bot luremwa, bedo ber ka waketo tamwa i tic me pwony nyo jo ma watye ka tic kwedgi.

Par pi Jo Mukene (1 Kor. 10:24; Pil. 2:4): Omyero pe waca yub me cokke me cito i tic me pwony kun wacito lacen, pien wangeyo ni watwero goyo cim nyo cwalo mesej pi penyo ka ma gurup tye ka tito iye kwena. Ka wao lacen, nongo myero dok kicak poko dano odoco. Ngene kene ni, i kine mukene jami mogo twero ngolle ma miyo wao lacen. Ento, ka wanyebe ki o con, nongo wanyuto pwoc pi yub pa Jehovah, dok ni waparo pi omego ma tye ka doro cokke, ki lutit kwena luwotwa.