Wulub Lanen pa Lunebi—Yona
1. Kit mabeco ango ma Yona onongo tye kwede?
1 Ka itamo i kom lanebi Yona, ngo ma bino i wii? Jo mukene giromo tamo ni en onongo lalworo nyo pe paro pi dano. Ento kono, en onyuto mwolo, tek cwiny, ki cwiny me jalle. Waromo lubo “lanen” me kit mabeco pa Yona nining?—Yak. 5:10
2. Waromo lubo lanen pa Yona me mwolo nining?
2 Mwolo: Mukwongo, Yona kong oringo woko wa ka mabor mapat ki ka ma kiore me cito ka tic iye. Man pe tye me ur pien jo Aciria onongo gingene pi tim me gero mumiyo kilwongo boma me Nineve ni “gang ma oyo remo pa dano.” (Nak. 3:1-3) Ento Jehovah omiyo Yona tira ci en omwolle oye me cito ka timo tic ma kimiye. (Car. 24:32; Yona 3:1-3) Kadi bed ni wiati en oringo woko, lacen en oye timo tic ma Jehovah omiye. (Mat. 21:28-31)
3. But ticwa me pwony mene ma mito tekcwiny ki jalle ken?
3 Tekcwiny ki Jalle Ken: I kare ma Yona oniang ni tam ma emoko-ni oketo kwo pa lukwang mel ka mading, en omine me jalo kwone pigi. (Yona 1:3, 4, 12) Lacen ma dong tye ka timo ticce i Nineve, en owoto odonyo wa i dye boma wek enong ka ma ebitito iye kwena me ngolo kop pa Jehovah. Man nyuto ni Yona onongo pe obedo lalworo, ento lanebi pa Lubanga ma cwinye tek! (Yona 3:3, 4) Wan ma wakwo i kareni kono? Tekcwiny ma a ki bot Lubanga mitte ka watye ka miyo caden i kare me aunauna ki bot jo ma gidagwa. (Tic 4:29, 31) Cwiny me jalle ken mitte wek wati ki cawawa kacel ki jamiwa pi cwako tic me pwony.—Tic 20:24
4. Pingo myero walwod lok i kom lanen mabeco ma lunebi pa Jehovah guweko?
4 Kare ducu ka itye ka kwano lok i kom lunebi pa Jehovah, ka imito nongo adwogi maber, go kong ni in aye itye i kwo ma guwoto ki iye. Penye kekeni ni: Tika onongo abiye timo tic man? Gin maber ango ma aromo pwonyone ki i lanen-ne? (Ibru 6:11, 12) I anyim, pwony mukene ma bikatti i Ticwa Me Ker binyamo gin ma waromo pwonyone ki bot lunebi pa Jehovah mukene ma gin lugen.