Ngo ma Miyo “Ibedo ki Yomcwiny”?
1. Ngo ma miyo ibedo ki yomcwiny i tum dwe acel acel?
1 Ngo ma miyo “ibedo ki yomcwiny” ka kipenyo lutit kwena ducu ni gumi ripotgi i tum dwe acel acel? (Gal. 6:4, NW) Kadi bed watye painia keken ma wacwalo cawa 130 i ticwa me pwony nyo wabedo lutit kwena ma kiyeniwa me cwalo kadi dakika 15 keken, wan ducu myero wabed ki yomcwiny me tic pi Jehovah ki cwinywa ducu.—Jab. 100:2.
2. Pingo omyero watute matek me tic pi Jehovah?
2 Kit macalo Jehovah tye Rwot ma Loyo polo ki lobo ducu-ni, en opore me nongo gin maber loyo ki botwa. (Mal. 1:6) Pi marwa pire, wan wadyero kwowa me timo mitine. Pi meno, i agikki me nino nyo dwe moni, ka watye ki gen ni wamiyo cawawa, dirowa, ki kerowa ducu i tic pi Jehovah calo “cam mukwongo cek,” ci nongo watye ki tyen lok me yomcwiny. (Car. 3:9) Ento, ka cwinywa ma ngoliwa kop-pi tye ka pidowa, ci myero wanen ni watimo gin mo me medo cawa i ticwa me pwony.—Rom. 2:15.
3. Pingo pe nyuto ryeko me pore ki luwotwa?
3 “Pe Ipor Ticci ki pa Lawoti”: Pe nyuto ryeko me bedo ka pore ki luwotwa nyo paro kero ma yam wabedo ka tic kwede pi Jehovah. Alokaloka bedo tye i kwo pa dano. Kero pa dano bene pe rom. Bedo ka pore kelo pyem nyo weko iwinyo calo kony-nyi pe. (Gal. 5:26; 6:4) Yecu pe oporo ngati mo ki latic lawote. Ma ka meno, en omiyo pwocce ma lubbe ki gin ma ngati moni romo timone.—Mar. 14:6-9.
4. Pwony ma pire tek ango ma watwero nongone ki i lapor pa Yecu i kom lim-mi?
4 I carolok pa Yecu i kom lim, kimiyo bot latic acel acel lim “kit macalo en romo tic kwede.” (Mat. 25:15) I kare ma laditgi odwogo ci openyo kit ma tic owoto kwede, jo ma gutiyo matek ma lubbe ki kerogi gulimo pwoc dok gudonyo i yomcwiny pa laditgi. (Mat. 25:21, 23) I yo acel-lu, wan bene ka watiyo matek i ticwa me tito kwena me Ker-ri, ci waromo bedo ki gen ni Lubanga bipwoyowa dok wabibedo ki yomcwiny!