Bok Me Lapeny

◼ Lunyodo aryo ducu mono gitwero miyo ripotgi pi cawa ma gicwalo i kwangi macalo jo me ot kare ducu?

Kadi bed ni tic me pwonyo lutino ki ‘nyebogi i kit mabeco ma Jehovah pwoyo’ tutwal­le tye i wi wego, ento lunyodo aryo-ni ducu giribbe kacel i pwonyo lutinogi. (Ep. 6:4) Baibul cuko cwiny lutino ni: “Latin, winy lok ma woru pwonyi kwede, pe ikwer winyo pwony pa meni bene.” (Car. 1:8) Yo acel ma pire tek ma lunyodo gitiyo kwede obedo kwano Baibul kacel macalo jo me ot.

I kare mukato angec, lanyodo acel keken ma onongo kwano ki lutinone ma peya gunongo batija aye miyo ripot, kadi bed gin aryo ducu nongo gunywako i kwan meno. Ento, alokaloka dong tye i yub man. Ka lunyodo aryo-ni ducu gunywako i pwonyo lutinogi i kare me kwan macalo jo me ot, ci giromo kwano cawa me tic me pwony ma pe kato acel i cabit ducu. Tye kono ni, lunyodo gitero cawa malac i pwonyo lutinogi i cabit ducu. Pwonyo lutino mito tute matek ki tung bot lunyodo. (Nwo. 6:6-9) Ento, ripot me tum dwe acel acel myero onyut tutwalle tic me pwony ma nongo kitimo ki woko pe i ot. Pi meno, omyero pe kikwan cawa makato acel i cabit acel acel kadi bed ni kwanne cwalo cawa makato acel woko, kun bene kikwano tyen mapol i cabit acel nyo kadi kikwano ki lutino mapat pat i cawa mapat pat. Lanyodo acel keken aye oromo miyo ripot me kwano Baibulgi macalo jo me ot ki dong dok cen ka lim acel i cabit ducu ma kwan obedo iye.