In Mono Ipenyo pi Jo Mukene?

Ka ce itye ka kwano Baibul ki ngati mo i kare-ni pingo pe ipenye ka gwok nyo lureme wadine nyo luwote mogo bene gimito ngeyo ngo ma Baibul pwonyo? Pol kare gimiyo nying jo mapol. Ka latin kwan oye ci iromo tic ki nyinge ka icito bot jo magi me cako kwano Baibul kwedgi. Itwero wacci: “[Tit nying latin kwan meno] onongo kwano Baibul tye ma mit adada ci otamo ni in bene iromo nongo mit pa kwano Baibul kwedwa.” Ci inyut wiye wiye kit ma kwan man woto kwede kun itiyo ki buk me Baibul Pwonyo.

Ka itye ki latin kwan ma dong tye ka dongo maber iromo cuko cwinye me tito yub me kwan man bot lureme nyo jo me pacogi ma nongo gitye ki miti. En oromo lwongogi me bedo tye i kare me kwanwu. Nyo ka ce meno pe ber ci en romo niangogi wek irwatte kwedgi me nyutigi yub me kwan man. Ka itimo kit man ci romo cuko cwiny latin kwan me cako nywako ngec me Baibul ma en tye kwede ki jo mukene.

Jo mogo ma in idok ka limogi kare ki kare bene guromo nyutti jo mukene kadi bed ni gin kikomgi nongo pud peya guye cako kwano Baibul kare ki kare. Ka itye ka miyo buk me Baibul Pwonyo iromo penyogi ni, “In ingeyo ngat mo mukene ma nyo romo mito buk man?”

Ma lubbe ki kare man ma odic-ci omyero watiyu ki yo ducu ma twere me konyo dano wek guwiny lok me kwena maber-ri. In mono ipenyo pi jo mukene?