Bed kun Ikuro Jehovah
1. Gure madit-ti wi lokke tye ningo, dok pingo man orwatte i karene kikome?
1 Icaya ocoyo ni: ‘Jehovah aye Lubanga ma ngolo kop atir, jo ducu ma gibedo kun gikure gitye ki gum.’ (Ic. 30:18b) Tic me ngolo kop pa Lubanga i kom lumonene ki laro luticce ma lugen tye mapol i Baibul. Kit pwony ango ma jo ma giworo Jehovah i kare-ni ginongo ki i lok magi? Ngo ma watwero timone i kare-ni wek wabed ma wayubbe pi “nino pa Rwot madit ma kelo lworo”? (Joel 2:31, 32) Gurewa Madit me Distrik ma wi lokke tye ni “Larre Dong Tye Cok!” bicuko cwinywa me lwodo lok i kom lapeny magi kun nongo wangine kwede kekenwa. Bikonyowa bene me bedo kun nongo wakuro Jehovah.
2. Watwero nyuto pwocwa pi gure madit me distrik nining?
2 In tika dong iyubo yub wek ibed tye dok inong ber pa gure man me nino adek-ki ducu? Me lapore, mono dong ityeko penyo ladit ticci me mini kare wek ibed tye i gure man? Pe itam ni birwatte ki gum. Bed ka lega pire, ci ipeny ladit ticci. (Nek. 2:4, 5) I kit yo acel-lu, omyero pe wabed ka diro nino me tyeko yubwa pi lok kom kit me wot, kabuto, ki jami mukene ma mitte. Goyo pulan ma kit man nyuto pwocwa pi cam me cwiny ma Jehovah cibo i wi mejane. Luelda myero gubed atera me konyo jo ma gimito kony ma lubbe ki yubgi me gure, tutwalle jo muti ma gitye i kacokke.—Gal. 6:10.
3. Kodi kit ango ma myero onen i kin jo pa Jehovah i boma ma gure madit bibedo iye?
3 Ber Kit Kelo Deyo i Kom Lubanga: Ka wacokke ma dwong i gure madit, ber kitwa miyo caden bot jo me kabedo meno. Dong mitte ni watim ngo? Ka watye i otel, ot me cato cam, nyo ka mukene ma kitimo iye biacara i kabedo ma gure madit tye iye-ni, lutic ma kunnu omyero guwiny maber pi ber kitwa macalo Lukricitayo. Kit magi aye mwolo, diyo cwiny, gwokke ken, ki niango. (Gal. 5:22, 23; Pil. 4:5) Wan ducu omyero wanyutu kodi mar ma “pe nyatte, pe tiyo gin ma pe myero, pe yenyo gin mukemo en kene; pe bedo ki keccwiny.” Kadi bed ni gin mo marac nyo peko mo ongolle, wabimito ni ‘watim gin ducu pi miyo deyo bot Lubanga.’—1 Kor. 10:31; 13:5.
4. Lunyodo gitwero konyo lutinogi me bedo ki kit maber i yo ma kelo deyo bot Jehovah nining?
4 I yo nge gure madit mo, cwiny ladit me otel mo obedo yom pi ruk ki ber kit buluwa mumiyo en onyuto mitine “me weko ka buto i otel-le pi Lucaden pa Jehovah kare ducu.” Man keliwa yomcwiny madit atika! Man bene omedo makci madit pi pwony ki gwok ma wun lunyodo wumiyo. Pe bedo me ryeko ka lunyodo guweko lutinogi me bedo i otel nyo i ot buto moni labongo nenogi maber. Gwoko lutino mitte cawa ducu. (Car. 29:15) Walego ni kitgi maber-ri okel pak bot Jehovah dok oyom cwinye!—Car. 27:11.
5. Wan watwero kelo deyo i kom Jehovah i rukwa ki kit ma wanen kwede nining?
5 Ruk ki Kit ma Wanen Kwede Obed Maber: Ngat acel acel ki i kinwa twero weko dano neno gurewa madit-ti maber ka pe wamiyo rukwa nyo kit ma wanen kwede bedo marac ma okato kare woko. Man omyero obed kadi ka watye ka cito nyo dwogo ki i boma ma gure madit bibedo iye-ni, ka watye ka miyo kony me yubo ka ma gure man bibedo iye nyo ka dong watye i yub me gure kikome. Macalo lutic pa Lubanga, tamwa mukwongo omyero obed me lonyo nying Jehovah ento pe me cobo mitiwa kenwa. Luwi odi myero gunen ni jo me odigi gubedo ma ginen ma mwonya dok ma ginyuto kwiri kare ducu.—1 Tem. 2:9.
6. Pingo pire tek me bedo ma wanen maber i kare ma nongo dong yub me gure otum?
6 Pire tek bene me bedo ma wanen maber i cawa ma nongo watye i kabedo me buto, i dukan, nyo ka ma wacamo iye. Ber me bedo ki bongo ma waruko i gure-ni ka wacito woko ka cam i nge yub. Ruko baj me gure-ni miyowa kare me miyo caden.—2 Kor. 6:3, 4.
7. Wan watwero weko gure madit woto mapwot ki yomcwiny nining? (Nen “Lok me Poyo Wic pi Gure Madit.”)
7 Icaya oloko con ni: ‘Jehovah tye ka kuro me nyuto berre botwu; meno omiyo en oyubbe pi timowu kica.’ (Ic. 30:18a) Pwoc pi kica kacel ki mar pa Jehovah ma pe wapore pire-ni myero owek wakel deyo i kome i kitwa ki kit ma wanen kwede ka wacokke kacel i gurewa madito. Walego ni Gurewa Madit me Distrik ma wi lokke tye ni “Larre Dong Tye Cok!” okel deyo i kom Lubangawa dok okonywa me bedo kun wakuro en!
Box on page 4]
Lok me Poyo Wic pi Gure Madit
◼ Cawa me Yub: Yub bicakke cawa 3:30 me odiko i nino adek-ki ducu. Kibiyabo doggola cawa 2:00 kikome me odiko. Dakika manok ma nongo cokke me odiko peya ocakke, won kom bibedo piny i wi abam kun nongo kiketo wer me Ker woto kikoko. I cawa meno wan ducu omyero wabed piny wek yub ocakke i yo maber. Yub man bitum cawa 11:15 me otyeno i Ceng Abic, Ceng Abicel cawa 11:05 me otyeno, ka dong i Ceng Cabit cawa 10:10 me otyeno.
◼ Ka Gwoko Giwot: Ka ma kigwoko iye giwot maber bibedo tye i kabedo me gurre ducu labongo cul mo, dok kibimiyone ma lubbe ki ngat ma okwongo bino wiya ti. Ngat ma tye ki baj me gurre madit aye kibimiye ka gwoko giwote.
◼ Gwoko Kabedo: Iromo gwoko kabedo pi jo ma wuwoto kwedgi i mutoka acel nyo jo ma wubedo kwedgi i paco acel.
◼ Cam me Dyeceng: Tim ber ibin ki cam me dyeceng me kaka weko kagurre me cito ka cam woko i kare me yweyo me dyeceng. Ber me tic ki gin me mako cam matidi ma kiromo ketone i te kom. Jami madongo me mako cam, jami ma obedo gilac, kacel ki kongo pe gimitte i kabedo me gurre madit.
◼ Miyo Mot: Yubo gurre madit me distrik tero lim mapol adada. Pi meno wan watwero nyuto pwocwa ki miyo motwa pi konyo tic me ker i wi lobo ducu ki i Ot me Kerwa nyo ki i gurre madit.
◼ Two ki Awano ma Bino Atura: Ka two mo ocakke atura i kagurre madit, tim ber itit ki lajol welo mo ma tye cok kwedi, en bimiyo ngec meno cut Kama Kimiyo iye Kony wek ngat ma tye ki ngec i miyo kony oyot onen lit pa twone kacel ki mine kony. Ka ce tye marac ci omyero kiter i ot yat macok ki kenyo.
◼ Mako Dwan: Kit lamak dwan mo keken omyero pe kikub ki tol me mac alektrik nyo tol me lakub dwan i gurre, gin lamak dwan omyero kiti kwede i yo ma pe yelo jo mukene.
◼ Mako Cal: Ka imako cal, ci tim ber pe iti ki mac lamak cal i kare ma cokke tye ka wot anyim.
◼ Jami Matino ma Kok ki Cim Cing: Jami ma kit magi omyero gubed ma pe giromo yelo dano.
◼ Jami ma Ngwecgi Kur: Gure madito mogo oromo timme ki i ot ma doggi kiloro woko ma macin ma kiyo yamo aye cwalo yamo iye. Ka kabedowu tye kit man, ci tim kica pe iti ki moo nyo pafium ma ngwece kur tutwal ma twero kelo peko bot jo ma tye ki two ma mako ot yweyo ki mukene ma pe mito ngwec piny ma oculle.—1 Kor. 10:24.
◼ Fom me Lubo Kor Dano: Omyero wati ki fom me Please Follow Up (S-43) me miyo ngec i kom ngat mo ma onyuto miti i kare ma nongo watye ka miyo caden ma pe wayubbe pire i kare me gure. Lutit kwena myero gubin ki fom me lubo kor dano-ni i ka-gure madit. Fom magi bene binonge bot Jo ma Gwoko Bukke i gure madit. Ka dong ipongo fom man ci iromo miyone bot Jo ma Gwoko Bukke nyo bot karan me kacokkewu ka ce idok gang.—Nen Our Kingdom Ministry me Febuari 2005, pot 6.
◼ Kabedo me Buto: (1) Pe iwek kigwok ot buto mapol ma pe ibiromo tic kwedgi ducu, dok pe iwek wel dano gukat wel ma mitte me buto i ot moni. (2) Ka dong pe imito ot ma ipenyo pigi-ni, ci mi ngecce bot wegi ot labongo galle. (3) Pe ited tedo ka ma pe kiyubo me tedo nyo i ot buto ka ma dano mapol buto iye nikwanyo ka kimini twero. (4) Bed ki kit ma cwiny maleng nyako ka itye ka lok ki jo ma gitiyo i kabedo ma ibuto iye, tutwalle i kare ma nongo tic omakogi mada.