Wan Watwero Miyo Kony Nining?
1 Lucaden pa Jehovah pol kare gipenye ni “Wan watwero miyo kony nining?” ka ce peko ma poto atura opoto i kabedo mukene. Kit ma lok ma tye i Tic pa Lukwena 11:27-30 nyuto kwede, Lukricitayo me cencwari me acel ma onongo gibedo ka mukene gucwalo kony bot utmego ma onongo gibedo i Judaya pien kec onongo opoto kunnu.
2 I kare-ni, dulwa-ni dong oketo cik ma ye tic ki cente me konyo jo ma nongo peko ma poto atura nyo peko ma dano aye kelo opoto i komgi nyo kadi peko mukene ma pat-te.
3 Me labolle, i mwaka mukato-ni utmegiwa gujogo cente me konyo jo ma peko opoto i komgi i kare ma oyengyeng otugo pii tsunami i Kupiny me lobo Acia. Wamiyo pwoc matek tutwal bot jo ma gunyuto cwiny maber me miyo mot me kony ma kit man bot dulwa. Ento, cik me lobbe mukene mito ni ka kimiyo cente me cobo peko moni, mitte ni omyero kitii kwede kit ma nongo jo ma gumiyo-ni gimito ni kitii kwede dok bene obed pi kare moni-ni kadi bed ni miti pa utmegiwa ocobbe nyo pe.
4 Pi meno oweko kimiyo tam ni mot ma kimiyo me konyo lupeko-ni omyero kimi macalo mot me konyo tic ma mako wilobo kulu. Cente man kitiyo kwede me konyo lupeko kacel ki dongo tic me cwiny pa utmego ma Lukricitayo dong ducu. Ento ka nyo pi tyen lok mo, ngat moni otamo ni omyero emi kony man obed pat ki man me konyo tic ma mako wilobo kulu-ni, ci kigamo dok bene kibitic kwede me miyo kony ka ma nongo kony mitte iye. Ento, bedo ber ka ce mot man kimiyo labongo cimo kit ma omyero kitii kwede nyo ka kwene ma myero kicwal iye.
5 Wan wamito ni kimii mot ki nying tic ma mako wilobo kulu wek lim obed tye me tiyo tic mo keken ma mako tic me Ker-ri, ento pe me kuro peko ma bino anyim keken. Man rwatte ki lok ma tye i Jo Epeco 4:16, ma waco ni myero watiyu kacel me miyo gin ma mitte wek ‘kom odong maber i mar.’