Lok Ada Madok i kom Kwo me Anyim

Yecu otito kit ma watwero ngeyo kwede ni “Ker pa Lubanga dong onyiko cok.” (Luka 21:31) En bene otito ni, i kin jami mukene, lweny bibedo tye matek, oyengyeng bitimme, kec ki two gemo bipoto i kabedo mapol​—jami ma watye ka neno i kare-ni moko lok meno.​—Luka 21:10-17.

Baibul medde ki nyuto ni i “kare me agikki” me loc pa dano, jo mapol gibibedo ka timo tim maraco. Itwero kwano lok meno i 2 Temceo 3:1-5. Ka ineno kit pa jo magi ki ticgi, weko ibedo labongo akalakala mo ni lok me Baibul rwatte ki gin ma tye ka timme i kare-ni.

Man nyuto gin ango? Kare dong cok wek Ker pa Lubanga okel alokaloka madongo ma bigudo kwo pa dano i yo maber. (Luka 21:36) I Baibul, Lubanga ocikke me kelo jami mabeco i lobo ki pi jo ma gibedo iye. Nen kong labol mogo manok.

LOC MABER

“Gitingo loc ducu gimiyo i cinge [Yecu], kacel ki ker ducu ki deyone wek lwak me rok ducu ki rok ducu, ki jo ma loko leb mapatpat-gu ducu, gubed luticce. Locce aye loc ma bedo matwal, locce pe bigik, ki kerre bene pe gitwero turone.”​—DANIEL 7:14.

Kit ma lok man gudi kwede: Itwero nongo mit pa kwo i te loc pa gamente ma Lubanga oketo ma biloyo lobo ducu dok Wode aye tye Kabakane.

YOTKOM

“Pe tye dano mo ma bedo i lobowa ma biwaco ni, ‘An koma lit.’”​—ICAYA 33:24.

Kit ma lok man gudi kwede: Pe ibibedo ki two nyo ngolo mo keken dok ibibedo kwo matwal labongo to.

KUC I KABEDO DUCU

“En juko lweny woko i wi lobo ducu.”​—JABULI 46:9.

Kit ma lok man gudi kwede: Lweny kacel ki deno can ma lweny kelo bibedo pe.

LOBO BIPONG KI DANO MA KITGI BECO

“Dano marac dong bibedo pe matwal . . . Jo mamwol aye gibicamo lobo.”​—JABULI 37:10, 11.

Kit ma lok man gudi kwede: Lutim marac dong gibibedo pe, ento jo ma gitye ki miti me bedo luwiny bot Lubanga keken aye gibidong.

LOBO DUCU BIDOKO PARADIC

“Dano gibigero odi ci gibedo i igi, gibipuro poto olokgi, ci gibicamo nyige bene.”​—ICAYA 65:21, 22.

Kit ma lok man gudi kwede: Lobo ducu bidoko kabedo mamwonya adada. Lubanga bicobo lega ma walego ni kiti mitine “i lobo.”​—Matayo 6:10.