Tika Onongo Ingeyo?

Tic ango ma onongo lagwok ot timo i kare me Baibul?

I KARE me Baibul, lagwok ot onongo gwoko jami ma i ot pa ngat mukene.

I kare ma Yucepu, wod pa Yakobo onongo tye opii i Ejipt, Yucepu odoko lagwok ot pa laditte. Ki lok ada, Laejipt ma ladit ticce “omiyo jami ducu i te loc pa Yucepu.” (Acak. 39:2-6) Lacen, i kare ma Yucepu odoko laloc ma rwomme dit i Ejipt, en bene ocimo lagwok ot me loyo ode.​—Acak. 44:4.

I kare pa Yecu, wegi ngom onongo pol kare gibedo i boma madongo ka mabor ki potigi. Pi meno, wegi ngom pol kare onongo gicimo lugwok ot ma gineno wi tic pa lupur ma gitiyo i poti magi.

Anga ma onongo opore me bedo lagwok ot? Lacoc mo me Roma ma okwo i cencwari me acel ma nyinge Columella omiyo tam ni opii ma onongo kitwero cimone me bedo lagwok ot omyero “obed ngat ma kong kitemo ngecce” me tic i poto. En omyero obed ngat ma “neno ni lutic gitiyo ticgi labongo keto gero i komgi.” Lacoc acel-li omedde ni: “Gin ma pire tek loyo ducu ma mitte ki bot lagwok ot obedo ni en myero pe otam ni engeyo jami ducu dok en myero obed ki miti me pwonyo jami manyen.”

Lok pa Lubanga tiyo ki lapor pa lagwok ot ki ticce, me tito pi jami mogo ma timme i kacokke pa Lukricitayo. Me labolle, lakwena Petero ocuko cwiny Lukricitayo me tic ki dirogi ma Lubanga ominigi me ‘konnye kekengi, macalo lugwok-jami mabeco, ma gitiyo ki mot me kica ma Lubanga omiyo.’​—1 Pet. 4:10.

Yecu kikome otiyo ki labol pa lagwok ot i lapore ma kicoyo i Luka 16:1-8. Medo i kom meno, i kare ma Yecu otito pi jami ma binyuto dwogone, en ocuko cwiny lulub kore ni ebicimo “lagwok ot ma lagen.” Tic ma pire tek loyo ma kimiyo bot lagwok ot-ti aye me miyo cam me cwiny bot lulub kor Kricito i kare me agikki. (Mat. 24:45-47; Luka 12:42) Watye ki pwoc me bedo i kin jo ma gitye ka nongo jami akwana, vidio, ki jami me awinya ma lagwok ot ma lagen yubo dok poko i wi lobo-ni ducu.