Kit ma Cokke me Kwowa ki Ticwa Macalo Lukricitayo Myero Obed Kwede

Lok ma Tye Iye

1. Tira ma tye i waraga man bikonyo jo ducu ma gitye ki pwony i cokke me Kwowa ki Ticwa Macalo Lukricitayo. Myero inen ni ikwano tira madok i kom kit me doro bute mo kit ma kitito kwede i Yub me Cokke me Kwowa ki Ticwa ki dong waraga man ma peya icako yubo pwonyi. Myero kicuk cwiny lutit kwena ducu me cako miyo pwony. Jo mukene ma gibino i cokkewa bene gitwero miyo pwony tekke giye i kom pwony me Baibul dok gikwo ma lubbe ki cik ma igi lac me Baibul. Laneno me Cokke me Kwowa ki Ticwa myero onyam jami ma mitte pi ngat mo keken ma pe obedo latit kwena ma mito cako miyo pwony i cokke man. En myero otit bot ngat meno ka romo cako miyo pwony nyo pud pe oporre. Man myero kitim ma nongo ngat ma tye ka kwano Baibul ki ngat meno bene tye (nyo ka lanyodone ma onongo batija bene tye). Gin ma mitte rom aroma ki gin ma mitte pi ngat mo me doko latit kwena ma peya onongo batija.—od dul 8 para. 8.

LOK ME CAKONE

2. Dakika acel. Cabit ducu, i nge cako cokke ki wer ki lega, wonkom me Cokke me Kwowa ki Ticwa bitugo miti i cwiny dano pi purogram me cokke meno. Dok myero olok tutwalle i kom jami ma pigi tego ma bikonyo kacokke.

LONYO MA TYE I LOK PA LUBANGA

3. Pwony: Dakika apar. Kibiketo wi lok madit me pwony man kacel ki lok aryo nyo adek mo ma pigi tego i Yub me Cokke me Kwowa ki Ticwa. Laelda nyo lakony kor tic mucwiny aye myero omi pwony man. Ka kicako kwano buk manyen me Baibul i cabit meno, ci kibinyuto vidio ma loko i kom buk meno. Ngat ma tye ka miyo pwony twero lok i kom kit ma vidio meno kubbe kwede ki wi lok madit me pwonye. Ento, myero onen ni enyamo lok ma pigi tego ma kiketogi i yub me cokke. Dok ka cawa pud tye, en myero olok i kom cal ma kiketogi, ma bene obedo but pwony meno. En twero yero me medo kor pwonye kun tiyo bene ki pwony mukene ma nonge i bukkewa tekke rwatte ki pwony ma kiketo i yub me cokke.

4. Yenyo Lonyo me Cwiny: Dakika apar. Man obedo lapeny ki lagam, labongo lok mo me cakone, ki me dolo tere. Laelda nyo lakony kor tic mucwiny aye myero odor bute man. Omego ma bidoro pwony man myero openy lwak ki lapeny aryo-ni ducu. Dok en twero neno ka ce mitte ni kikwan ginacoya ma kiketo, nyo pe. Jo ma kicimogi myero gumi lagam pi cekon 30 nyo ma pe o.

5. Kwano Baibul: Dakika angwen. Pwony man omego aye myero omi. Lutino kwan ma kiminigi pwony man myero gukwan wang Ginacoya ma kiketo-ni labongo waco lok mo me cakone nyo me dolo tere. Wonkom me cokke myero oket cwinye tutwalle me konyo latin kwan me kwano nyig lok ducu kit ma kicoyo kwede, loko dwane i yo mupore, ling ka ma mitte, ki dong lok kit ma en loko kwede jwi. Kit macalo kwan me Baibul pi cabit mogo cego dok mukene boco, wonkom me Cokke me Kwowa ki Ticwa myero otam pi kero pa latin kwan ka tye ka pongo fom pi lutino kwan me bute man.

TUTE MATEK I TIC ME PWONY

6. Dakika aparabic. Bute man kiyubo me konyo dano ducu me yubbe maber ki me dongo dirogi me boko lok ki dano ki dong nywako i tic me tito kwena ki pwony. Luelda bene kiromo minigi pwony man. Latin kwan acel acel myero oti i kom pwony ma tye i brocuwa me Pwony nyo Mar Dano kit ma kinyuto kwede i Yub me Cokke me Kwowa ki Ticwa. I kine mukene, pwony mogo bibedo macalo nyamo lok. Laelda nyo lakony kor tic mucwiny aye myero odor bute meno.—Nen paragraf me 15 me niang kit me doro bute me nyamo lok.

7. Kit me Cako Lok: Pwony man kitwero miyone bot omego nyo lamego. Ka kimiyo ki omego ci lakony kore myero obed omego bene nyo ngat mo me gange. Dok ka kimiyo ki lamego ci lakony kore myero obed lamego bene nyo ngat mo me gange. Latin kwan ki lakony kore gitwero bedo piny nyo cung acunga.—Pi ngec mukene ma lubbe ki pwony man, nen paragraf me 12 ki 13.

8. Dok Cen ka Lim: Pwony man kitwero miyone bot omego nyo lamego. Ka kimiyo ki omego ci lakony kore myero obed omego bene. Dok ka kimiyo ki lamego ci lakony kore myero obed lamego bene. (km-E 5/97 p. 2) Latin kwan ki lakony kore gitwero bedo piny nyo cung acunga. Latin kwan myero onyut ngo me awaca ka odok cen bot ngat ma onyuto miti wiati.—Pi ngec mukene ma lubbe ki pwony man, nen paragraf me 12 ki 13.

9. Kony Dano me Doko Lupwonnye: Pwony man kitwero miyone bot omego nyo lamego. Ka kimiyo ki omego ci lakony kore myero obed omego bene. Dok ka kimiyo ki lamego ci lakony kore myero obed lamego bene. (km-E 5/97 p. 2) Latin kwan ki lakony kore gitwero bedo piny nyo cung acunga. Pwony man myero onyut kit me kwano Baibul ki dano kun kimiyo i yo ma nyuto ni kwan onongo dong ocakke woko. Pe mitte ni iwac lok mo ma nyuto ni pud wubicako kwan acaka nyo me dolo te kwanwu, nikwanyo ka latin kwan tye ka tic i diro me pwony pi kit me cako nyo dolo te lok. Pe mitte ni kikwan paragraf ducu, kadi bed i kine mukene kitwero kwanone.

10. Tito pi Niyeni: Ka kibimiyo bute man macalo pwony, ci omego aye myero omi. Ento ka bibedo macalo lapor, ci kiromo miyone bot omego nyo lamego. Ka kimiyo ki omego ci lakony kore myero obed omego bene, nyo ngat mo me gange. Dok ka kimiyo ki lamego ci lakony kore myero obed lamego bene, nyo ngat mo me gange. Latin kwan myero omi lagam pi lapeny ma kiketo-ni ki diro dok i yo ma niang iye yot kun tiyo ki ngec ma nonge ka ma kikwanyo pwony meno ki iye. Latin kwan romo moko tamme ka ce ebiwaco ka ma ekwanyo iye pwonye.

11. Pwony: Pwony man omyero kimi bot omego, dok en myero omi bot kacokke. Ka pwony man jenge i kom lamed ngec me 1 i brocuwa me Mar Dano, ci latin kwan myero onyut kit ma tyeng magi kiromo tic kwedgi i tic me pwony. Me labolle, en romo tito awene ma kitwero tic kwede ki tyeng mo, tyen lok me tyeng meno, ki dong kit me konyo ngat mo me niang tyeng meno. Ka pwony meno jenge i kom pwony mo ma tye i brocuwa me Mar Dano, ci latin kwan myero olok tutwalle i kom kit me lubo pwony meno i ticwa me tito kwena. En twero lok i kom labol ma tye i lok me 1 me pwony meno nyo tyeng mukene ma tye i pwony meno ka ce porre.

12. Gin me Awaca: Lok ma tye i paragraf man ki ma lubo-ni kwako “Kit me Cako Lok” ki dong “Dok Cen ka Lim.” Ka pe dok kitito gin mukene mapat, latin kwan myero onywak lok ada mo mayot ma rwatte ki ngat ma en tye ka lok kwede dok ocib te guti pi nyamo lok i nino ma lacen. Latin kwan myero oyer pwony mo ma rwatte ki ngo ma tye ka timme i kabedowu dok gudo cwiny dano me wang ticwu. En twero moko tamme ka ce ebimiyo ginakwana nyo enyuto vidio mo ki i kin Jami Ticwa ma Pigi Tego me Pwony. Ma ka cako lokke kun nwoyo lok ma en omako ki wiye, latin kwan myero onyut diro me nyamo lok ki dano, kun nyuto miti dok loko kit ma en loko kwede jwi.

13. Ka ma Kitye ka Miyo Iye Caden: Latin kwan myero olub kabedo ma kinyuto-ni i yo ma rwatte ki wang ticwu. Me labolle:

(1) I Ot ki Ot: Man kwako tito kwena i ot ki ot—twero bedo wang ki wang, ki cim, nyo waraga—ki dong dok cen ka nyamo lok ki ngat mo ma kinongo i ot ki ot.
(2) Miyo Caden i Kare ma Owec: Man kwako tic ki kare ma owec me cako miyo caden ma nongo itye ka boko lok ki ngat mo. Man bene kwako nywako Ginacoya ki jo ma irwatte kwedgi i gang tic, i cukul, ka ma ibedo iye, ka itye ka cito ka mo ki mutoka, nyo itye ka timo ticci me nino ducu.
(3) Tito Kwena i Dye Lwak: Man kwako tic ki lalor bukke, tito kwena ka ma kitimo iye biacara, miyo caden i teng gudo, ka ma kiito iye mutoka, ka ma kigwoko iye mutoka, nyo ka mo keken ma dano twero nonge iye.

14. Tic ki Vidio ki dong Ginakwana: Ma lubbe ki pwony ma kimine, latin kwan twero moko tamme me nyuto vidio nyo tic ki ginakwana mo. Ka pwony moni tye ki vidio nyo latin kwan oyero me tic ki vidio, en myero olok i kom vidio meno ento pe otuki.

KWOWA MACALO LUKRICITAYO

15. I nge wer, bute ma lubo ma bedo pi dakika 15 bibedo ki pwony acel nyo aryo ma kiyubo me konyo lwak me keto Lok pa Lubanga i tic. Ka pe dok kinyuto gin mukene mapat, laelda nyo lakony kor tic mucwiny aye myero odor bute magi. Ento, luelda keken aye myero gumi kop ma mako kacokke. Ka bute moni obedo pwony ki lapeny, ngat ma tye ka doro bute meno romo penyo lapeny mukene medo i kom lapeny ma kiketo-ni. En myero olok macek i acakkine wek omi kare me nyamo pwony ma pigi tego ki dong, wek lwak omi tamgi. Ka bute meno kwako penyo dano, bedo ber ka ngat ma kibipenyo-ni obino i wi abam ma ka gamo lapeny ki ka ma en obedo iye, ka twere.

16. Kwano Baibul Kacel Macalo Kacokke: Dakika pyeradek. Laelda mucwiny aye myero odur bute man. (Ka ma luelda nok iye, lakony kor tic mucwiny twero doro bute man.) Luelda myero gumok anga ma oporre me doro bute me Kwano Baibul Kacel Macalo Kacokke. Jo ma kiyerogi me doro bute man myero gudor i yo maber, pe gukat wang cawa, guwek pwony ma pigi tego ma tye i ginacoya okati ka maleng, dok gukony dano ducu me niang kit me keto pwony ma kinyamo i tic. Jo mupore me doro bute man gibinongo adwogi maber ka gukwano tira ma kimiyo ma kwako kit me doro bute me lapeny ki lagam. (w23.04 pot. 24, bok) Ka dong kityeko nyamo bute ma kimiyo pi cabit meno, pe mitte ni dok kidur lok mapol. Ka twere, cabit ki cabit, myero kiti ki omege mapatpat me doro ki kwano buk nyo brocuwa ma kitye ka nyamone-ni. Ka wonkom me Cokke me Kwowa ki Ticwa owaco ni myero kijwik cawa ma kibitero i bute man, ci ladorone myero onen kit ma etwero jwikone kwede. En twero yero ni kikal kwano paragraf mukene.

LOK ME GIKONE

17. Dakika adek. Wonkom me Cokke me Kwowa ki Ticwa myero otit wiye wiye lok mogo ma pigi tego ma kinyamo i cokke me nino meno. En bene myero olok i kom jami mogo ma kibinyamo i cokke ma lubo. Ka cawa pud tye, en twero poyo wi lutino kwan ma gibimiyo pwony i cabit ma lubu. Wonkom me cokke myero okwan lok angeya mo keken kacel ki waraga ma tye bot jo me kacokke i cawa ma en tye ka dolo te cokke. Lok angeya ma jwi kimiyo calo yub me cokke pi tic me pwony ki dong yub me gwoko lengo omyero pe kikwan i wi abam ento kiket i kor ot ka ma kimwono iye lok angeya. Ka cawa pe obiromo me kwano lok angeya nyo waraga ma tye, ci wonkom myero olok ki omege ma bidoro bute me Kwowa Macalo Lukricitayo wek gujwik pwonygi macego cego. (Nen paragraf me 16 ki 19.) Cokke bigik ki wer ki lega.

MIYO PWOC KI TIRA

18. I nge pwony pa latin kwan acel acel, Wonkom me Cokke me Kwowa ki Ticwa myero oti ki dakika ma romo acel me miyo pwoc ki tira ma lubbe ki diro me pwony ma latin kwan-ni otiyo iye. Ka wonkom tye ka lwongo latin kwan moni i wi abam, en pe myero otit diro me pwony ma latin kwan bitic iye. Ento, ka latin kwan otyeko miyo pwonnye, wonkom me cokke myero opwoye, ci dong en twero tito diro me pwony ma latin kwan otiyo iye dok otit gin mumiyo latin kwan omiyo pwonye maber nyo otit ki kica ka ma mito ayuba. Wonkom bene twero lok i kom jami mukene ma latin kwan otimo ka en tamo ni meno bikonyo latin kwan-ni nyo lwak. I nge cokke nyo i kare mukene, wonkom bene twero miyo tira i wi mung bot latin kwan-ni kun tiyo ki brocuwa me Mar Dano, brocuwa me Pwony, nyo buk me Ministry School.—Pi ngec mukene ma lubbe ki tic pa wonkom me Cokke me Kwowa ki Ticwa, ki tic pa lami tira, nen paragraf me 19, 24, ki 25.

CAWA

19. Pwony mo keken pe myero okat wang cawa ma kimiyo, kadi wa lok pa wonkom me Cokke me Kwowa ki Ticwa. Kadi bed Yub me Cokke me Kwowa ki Ticwa nyuto cawa pi bute acel acel, ka dong kityeko nyamo pwony moni maber, pe mitte ni kidur lok mapol mere me tyeko cawa me bute moni. Ka ngat mo okato wang cawane, ci wonkom me Cokke me Kwowa ki Ticwa nyo lami tira myero olok kwede i wi mung. (Nen paragraf me 24 ki 25.) Cokke ducu, wa ki wer kacel ki lega omyero oter cawa 1 ki dakika 45.

LIMO PA LANENO ME ADWOL

20. Ka kacokke tye ki limo pa laneno, ci yub me cokke myero owot kit ma kitito kwede i Yub me Cokke me Kwowa ki Ticwa, ento pe kibibedo ki Kwano Baibul Kacel Macalo Kacokke i bute me Kwowa Macalo Lukricitayo. Me ka meno, kibileyo kakare ki pwony pa laneno ma tero dakika 30. Ento ma peya laneno omiyo pwony meno, wonkom me Cokke me Kwowa ki Ticwa myero kong owot wiye wiye i lok mogo ma pigi tego ma kinyamo i cokke me nino meno ki jami ma kibinyamone i cabit ma lubu, myero bene omi lok angeya ki dok okwan waraga ma tye, ka dong olwong laneno. I nge pwony meno, laneno bidolo te cokke ki wer ma en oyero. En twero lwongo omego mukene me dolone ki lega. Pe kibibedo ki kilaci mukene i cukul me aryo i cabit me limo pa laneno. Ento gurup mapat ki kacokke madit ma laneno bilimone-ni bibedo ki cokkegi kadi wa i cabit me limo pa laneno. Ento gibiribbe ki jo me kacokke madit ka winyo pwony pa laneno me adwol.

CABIT ME GURE ME ADWOL NYO GURE MADIT

21. I cabit me gure me adwol nyo gure madit, cokke mo keken bibedo pe. Omyero kipo wi kacokke ni pwony ma kiyubo pi cokke me cabit meno kiromo nyamone macalo jo me ot, nyo ngat acel acel twero kwanone pire kene.

CABIT ME NIPO

22. Ka Nipo opoto i dye cabit, ci Cokke me Kwowa ki Ticwa bibedo pe.

LANENO ME COKKE ME KWOWA KI TICWA

23. Komitti pa luelda aye biyero laelda ma myero obed laneno me Cokke me Kwowa ki Ticwa. En aye myero onen ni yub me cokke owoto maber, dok kilubo tira ma i waraga man. Kubbe maber myero obed tye i kin en ki lami tira. Ka Yub me Cokke me Kwowa ki Ticwa dong tye, ci laneno me Cokke me Kwowa ki Ticwa myero oco piny nying jo ducu ma gibibedo ki pwony i cokke me dye cabit pi dwe aryo-ni ducu. Man kwako wa jo ma gibimiyo pwony ma pe obedo pa lutino kwan, ki dong won kom me cabit acel acel, ki dong lutino kwan. (Nen paragraf me 3-16 ki 24.) Ka en tye ka miyo pwony bot lutino kwan, en myero otam pi mwaka pa latin kwan meno, ngecce, ki dong ka en bibedo agonya ka tye ka miyo pwony meno. En bene omyero otam i kom jami magi ka tye ka moko angagi ma bidoro bute mukene me cokke. Omyero kiniang ngat acel acel ma tye ki pwony ma nongo pud odong olo cabit adek. Omyero kiti ki karatac ma wiye tye ni Our Christian Life and Ministry Meeting Assignment (S-89) me poyo wi lutino kwan. Laneno me Cokke me Kwowa ki Ticwa myero onen ni kopi ma nyuto nying jo ducu ma bimiyo pwony i cokke me dye cabit kimwono i ka-keto ngec. Luelda gitwero cimo laelda nyo lakony kor tic mo me konye. Ento luelda keken aye myero guyer jo ma gibimiyo pwony ma pe obedo pa lutino kwan.

WONKOM ME COKKE ME KWOWA KI TICWA

24. Cabit ki cabit, laelda acel bibedo wonkom me Cokke me Kwowa ki Ticwa. (Ka ma luelda nok iye, kitwero tic bene ki lukony kor tic mucwiny.) En aye biyubo lok me cakone ki lok me gikone. En aye bene bilwongo jo ma gibibino i wi abam. Dok kitwero medde bene pwony mukene ka luelda nok, tutwalle but cokke mogo ma tye ki vidio keken labongo nyamo lok. Lok ma en loko i nge pwony pa jo mukene myero obed macek. Luelda aye myero gumok angagi ma gupore me bedo wegi kom me Cokke me Kwowa ki Ticwa. Dok kibibedo ka lokogi aloka. I kine mukene, laneno me Cokke me Kwowa ki Ticwa aye pol kare bitic macalo wonkom me Cokke. Ka laelda moni opore me doro Kwano Baibul Kacel Macalo Kacokke, ci nongo opore bene me bedo wonkom me cokke. Ento myero kiket i wic ni laelda ma bibedo wonkom myero omi pwoc ki tira i yo me mar bot lutino kwan ma gumiyo pwonygi. Wonkom myero onen ni cokke otum i cawane kikome. (Nen paragraf me 17 ki 19.) Ka wi abam lac dok wonkom mito, ci kitwero keto lakub dwan mukene ka ma en twero cung iye ka tye ka lok i kom pwony ma bilubo, wek omego ma bimiyo pwony meno ocit atir ocung cok ki lakub dwan pa lami pwony. I yo acel-li, wonkom twero bedo i nyim meja ka omego ma bikwano Baibul tye ka kwanone ki dok ka lutino kwan mukene-ni gitye ka miyo pwonygi. Man weko cawa pe balle.

LAMI TIRA

25. Ka twere, ber me tic ki laelda ma miyo pwony i yo mucwiny wek otim tic man. Tic pa lami tira aye me nyuto i wi mung ka ma mito ayuba bot luelda nyo lukony kor tic ma lubbe ki pwonygi, ma man kwako i Cokke me Kwowa ki Ticwa, pwony pi lwak, doro nyo kwano Wi Lubele, ki dong Kwano Baibul Kacel Macalo Kacokke. (Nen paragraf me 19.) Ka luelda ma gimiyo pwony i yo mucwiny gitye mapol, ci mwaka ki mwaka kiromo loko luelda aloka me tic macalo lumi tira. Pe mitte ni lami tira omi tira cawa weng ka tekke omego moni omiyo pwonye.

KILACI MUKENE

26. Ka lutino kwan pol, ci kacokke twero bedo ki kilaci mukene. Kilaci man myero obed ki lami tira mucwiny, tutwalle laelda. Ka mitte, kitwero tic ki lakony kor tic. Luelda aye myero gumok anga ma twero timo tic man ki dok ka mitte ni omyero kibed ka lokogi aloka. Omego man myero olub tam ma kimiyo i paragraf me 18. Ka kibibedo ki kilaci mukene, ci lutino kwan myero gukob i rumgi i nge bute me Yenyo Lonyo me Cwiny. Dok omyero guribbe ki kacokke i nge pwony me agikki pa latin kwan i cokke meno.

VIDIO

27. Kibiyero vidio ma rwatte pi cokke man. Kibiketo vidio pi cokkewa me dye cabit i JW Library^® dok kitwero kwanyone kun kitiyo ki tet mapat pat.

S-38-AC 11/23