PWONY ME 55

Tyel Kor Kacokke ma Itye Iye

Kit ma Nen Kwede i Buk Kikome

I but lobo ducu, dano milion mapol giworo Jehovah ki yomcwiny i kacokke alip mapol. Gitye ki pwoc pi pwony ki tira ma ginongo, dok gitye ka tyelo kor kacokkegi i yo mapol mapatpat. Tika in bene itye ka timo kit meno i kacokkewu?

1. I yo mene ma itwero tic ki cawani kacel ki keroni me tyelo kor kacokke?

Wan ducu watwero miyo kony i kacokke. Me labolle, tika tye ngat mo i kacokkewu ma oteggi nyo ma tye ki goro mo? Tika itwero konye wek ocit i cokke? Nyo tika itwero miye kony i yo mukene calo cito ka wilo cam ki jami ma mitte, nyo gwoko lengo me gange? (Kwan Yakobo 1:27.) Watwero jalle me gwoko lengo me Ot me Ker nyo yubo ka muballe. Pe kidiyowa adiya me timo jami magi, ento marwa pi Lubanga ki pi utmegiwa aye weko ‘wamine kenwa.’—Jabuli 110:3.

Lucaden ma gunongo batija gitwero bene tyelo kor kacokke i yo mukene mapat. Omege ma guteggi i yo me cwiny gitwero tic calo lukony kor tic nyo i nge kare mo, macalo luelda. Omege kacel ki lumege ducu gitwero tyelo kor tic me pwony kun gitiyo macalo painia. Lucaden mukene gitwero miyo kony me gero odi me woro nyo dak i kacokke ma mito kony.

2. Watwero tic ki cente ki dong jami ma watye kwede me tyelo kor kacokke nining?

Watwero ‘woro Jehovah ki lonyo ma watye kwede.’ (Carolok 3:9) Watye ki yomcwiny me miyo mot me cente ki jami ma watye kwede me tyelo kor kacokkewa ki dong ticwa ma kwako wi lobo ducu. (Kwan 2 Jo Korint 9:7.) Kitiyo bene ki mot ma wamiyo me konyo jo ma can opoto i komgi. Jo mogo ‘gipoko lim mogo pat’ kare ki kare wek gimi macalo mot. (Kwan 1 Jo Korint 16:2.) Watwero bolo motwa i canduk me bolo mot ma tye i kabedo me worowa nyo watwero miyone kun watiyo ki kabedowa me Intanet me donate.jw.org. Jehovah miniwa kare me nyuto marwa pire i kit ma watiyo kwede ki jami ma watye kwede.

NONG NGEC MATUT

Nen yo mogo mapatpat ma itwero tyelo kwede kor kacokke.

3. Watwero tic ki jami ma watye kwede

Jehovah gin ki Yecu gimaro ngat ma miyo jamine ki yomcwiny. Me labolle, Yecu opwoyo dato mo ma lacan ma otute matek me miyo mot bot Jehovah. Kwan Luka 21:1-4, ci wunyam lapeny magi:

Tika mitte ni wami cente madwong ka wek wayom cwiny Jehovah?
Jehovah gin ki Yecu giwinyo nining ka wamiyo mot ki cwinywa ducu?

Me niang kit ma kitiyo kwede ki motwa, tuk VIDIO. Ci wunyam lapeny man:

VIDIO: ‘Kel Jami ma Cwinyi Opwoyo Bot Jehovah’ (4:47)

Kitiyo ki mot ma wamiyo me konyo kacokke ma i twok lobo ducu nining?

Lamego muteggi tye ka bolo mot i canduk me bolo mot.

4. Watwero jalle me miyo kony

I kare me Baibul, jo ma woro Jehovah gutiyo matek adada me gwoko kabedogi me woro. Ento meno onongo pe kwako miyo mot me cente keken. Kwan 2 Tekwaro 34:9-11, ci wunyam lapeny man:

Luicrael ducu gumiyo kony me gwoko ot pa Jehovah nining?

Me neno kit ma Lucaden pa Jehovah gilubo kwede lanen pa lutic pa Jehovah me kare macon, tuk VIDIO. Ci wunyam lapeny magi:

VIDIO: Gwoko Kabedowa me Woro (3:31)

Cal ma kikwanyo ki i vidio ma wiye tye ni ‘Gwoko Kabedowa me Woro.’ Co, mon, ki lutino gitye ka dunyo i Ot me Ker.

Pingo pire tek me gwoko Otwa me Ker wek obed maleng dok maber?
Itwero miyo kony i yo ma nining?

Lucaden ma gujalle gitye ka gero Ot me Ker.

5. Omege gitwero bedo ma gupore me timo tic mapol i kacokke

Ginacoya cuko cwiny omege me tute matek wek gubed ma gupore me tyelo kor kacokke. Me neno labolle, tuk VIDIO. Ci igam lapeny ma lubo.

VIDIO: Omege—Wutute Matek Wek Wubed ma Wupore pi Tic Maber (5:19)

Ki i vidio man, Ryan otute matek me bedo ma opore pi tic mapol i kacokke nining?

Baibul tito jami ma omege myero gutim wek gubed ma gupore me tic macalo lukony kor tic ki luelda. Kwan 1 Temceo 3:1-13, ci wunyam lapeny magi:

Gin ango ma weko omege bedo ma gupore me tic macalo lukony kor tic ki luelda?
Jo ma ganggi kono myero gubed nining?—Nen tyeng 4 ki 11.
Jo me kacokke ducu ginongo adwogi mabeco nining ka omege gitute me bedo ma gupore?