PWONY ME 49
Jo me Otwu Twero Bedo ki Yomcwiny Nining?—Bute me 1
Jo ma pud gunyomme nyen gibedo ki gen ni yomcwiny ma gibedo kwede i nino nyomgi birii pi naka. Dok ki lok ada, meno twere. Lukricitayo ma dong gurii i nyom pi kare malac dok ma gutute matek me keto tam me Baibul i tic gingeyo ni meno twere.
1. Tam ango ma Baibul miyo bot co?
Jehovah ocimo laco me bedo lawi ot. (Kwan Jo Epeco 5:23.) Jehovah mito ni en omok tam ma bikelo adwogi maber bot jo me ode. Baibul miyo tam bot co ni: “Wumar monwu.” (Jo Epeco 5:25) Man te lokke ngo? Laco ma maro dakone, tero dakone ki kica, kadi ka gitye gang nyo i kin dano. En gwoko dakone ki i awano, mine jami me kom ma mitte, dok tute matek wek dakone obed ki yomcwiny. (1 Temceo 5:8) Ma dong pire tek loyo, en konyo dakone wek obed ki wat macok ki Jehovah. (Matayo 4:4) Me labolle, en twero lega ki kwano Baibul kacel ki dakone. Ka laco maro dok paro pi dakone, ci en bigwoko watte ki Jehovah.—Kwan 1 Petero 3:7.
2. Tam ango ma Baibul miyo bot mon?
Lok pa Lubanga waco ni dako “myero onen ni eworo cware.” (Jo Epeco 5:33) En twero timo meno nining? En twero tam i kom kit mabeco ma cware tye kwede ki dok kit ma cware tute kwede me gwoko en kacel ki lutinogi. En bene twero nyuto woro ka cwako tam ma cware omoko, loko ki woro bot cware, dok loko maber i kom cware, kadi bed cware pe woro Jehovah.
3. Jo munyomme twero jingo nyomgi nining?
Baibul loko i kom jo munyomme ni: ‘Gin aryo-ni gidoko kom acel.’ (Matayo 19:5) Man nyuto ni myero gutute matek wek mar ma tye i kingi pe odok goro. Gitimo man ka gicwalo cawa kacel kare ki kare dok i yo me mar gitito ka maleng tamgi ki kit ma giwinyo kwede. Pe giweko gin mo nyo ngat mo keken pire bedo tek loyo luotgi, mapat ki Jehovah. Gigwokke adada pe me dongo miti ma pe opore i kom ngat ma pe gunyomme kwede.
NONG NGEC MATUT
Nen cik mogo ma igi lac me Baibul ma twero jingo nyommi.
4. Wun co—wumar dok wugwok monwu maber
Baibul waco ni co myero “gumar mongi macalo gimaro komgi kengi.” (Jo Epeco 5:28, 29) Man te lokke ngo? Tuk VIDIO, ci wunyam lapeny ma lubo.
I yo mene ma laco twero nyuto kwede ni emaro dakone dok eparo pire?
Kwan Jo Kolocai 3:12, ci wunyam lapeny man:
Laco twero nyuto kit magi i nyom nining?
5. Wun mon—wumar dok wuwor cogwu
Baibul cuko cwiny dako me woro cware kadi bed cware woro Jehovah nyo pe. Kwan 1 Petero 3:1, 2, ci wunyam lapeny magi:
Ka cwari pe obedo Lacaden pa Jehovah, labongo akalakala mo imito ni en bene ocak woro Jehovah. Itamo ni gin ango maber loyo ma myero itim me konye—tito kwena bote cawa ducu kece bedo ki kit mabeco ki dong nyuto woro? Pingo?
Laco ki dako gitwero moko tam maber kacel. Ento i kine mukene, tam pa dako twero pokke woko ki pa cware. En twero tito bot cware tamme ki mwolo dok ki woro, ento wiye myero opo ni Jehovah omiyo bot laco tic me moko tam maber pi jo me ode. En myero otute me cwako tam pa cware. Ka en otimo meno, ci bikonyo jo ducu me gange me bedo ki yomcwiny. Kwan 1 Petero 3:3-5, ci wanyam lapeny man:
Jehovah winyo nining ka dako woro cware?
6. Itwero loyo pekki ma ikemme kwede i nyommi
Nyom ducu tye ki roc. Pi meno, jo munyomme myero gutute matek kacel me lweny ki pekki ma bedo i nyom. Tuk VIDIO, ci wunyam lapeny ma lubo.
Kit ma kinyuto kwede i vidio-ni, gin ango ma nyuto ni wat i kin laco ki dako-ni onongo dong pe tye macok?
Gin ango ma gutimo me jingo nyomgi?
Kwan 1 Jo Korint 10:24 ki Jo Kolocai 3:13. Ci wunyam lapeny man i nge kwano wang Baibul magi ki acel acel:
Keto tam man i tic twero jingo nyom nining?
Baibul waco ni ngat acel acel myero oket deyo i kom lawote. Keto deyo kwako tero ngat moni i yo me kica dok ki woro. Kwan Jo Roma 12:10, ci wunyam lapeny magi:
Tika mitte ni laco nyo dako okur kong ni lawote aye ocak keto deyo i kome? Pingo myero okur, nyo pingo myero pe okur?
JO MOGO GIWACO NI: “Wat i kin an ki luota dong pe tye macok kit macon.”
Itwero tito bote nining ni Baibul twero konyogi?
WOT WIYE WIYE
Laco ki dako gitwero bedo ki yomcwiny ka gimarre, ginyuto woro i kingi, dok giketo cik ma igi lac me Baibul i tic.
Ngo ma ipwonyo?
Gin ango ma laco twero timone wek gubed ki yomcwiny i nyomgi?
Gin ango ma dako twero timone wek gubed ki yomcwiny i nyomgi?
Ka itye ngat munyomme, cik mene ma iye lac me Baibul ma twero konyi me jingo nyommi?
TIM KWED
Nong tam mogo ma twero konyi me bedo ki yomcwiny i kwo me otti.
Nen vidio me wer ma nyuto mot ma inongo ka iketo i tic tam pa Lubanga i nyommi.
Nen gin ma ngat moni twero timone me nyuto woro i kom twero pa laco macalo lawi ot.
“Wun Mon, Pingo Myero Wumine i Te Loc pa Cogwu?” (Wi Lubele, Mai 15, 2010)
I yo ma nining ma luot mo guloyo kwede pekki mapatpat i nyomgi kadi wa peko me ket keny?