Dul Lok me Aboro
‘Lweny ki Dul Mony Mogo Maraco me Cwiny’
1. Pingo omyero waket tamwa i tic ma cwiny maraco gitimo?
DANO mapol gicayo tye pa jo mogo maraco me cwiny. Ento man pe obedo lok me nyero. Kadi bed dano giye nyo pe, jo maraco me cwiny gitye, dok gitye ka temme me keto dic i kom dano ducu. Kadi wa luwor Jehovah bene pe kikoyogi. Gin aye dong giketo wang i komgi ma loyo. Lakwena Paulo opoyo wic i lok meno, kun wacci: “Wan pe walwenyo i kom dano ma tye ki kom ki remo, ento walwenyo ki luloc ki wegi twero ma woko, ki i kom gin ducu ma loyo wi lobo ducu i kare man me colpiny, dok ki dul mony mogo maraco me cwiny ma tye i polo [ma pe ginen].” (Jo Epeco 6:12) I karewa-ni, dic ma cwiny maraco guketo dong tye i rwom ma lamal mada pien Catan dong kibayo woko ki i polo ki akemo, dok ngeyo ni karene dong odong manok.—Niyabo 12:12.
2. Twere nining pi wan me loyo lweny i kom cwiny ma gitek loyo dano woko ni?
2 Twere mono me loyo lweny i kom teko pa jo me cwiny ma tekogi kato pa dano woko? Twere gire, ento keken ni mito jenge i kom Jehovah kwicikwici. Myero wawiny en dok walub Lokke. Ka watimo meno, watwero bwot ki i peko ma jo ma gitye i te loc pa Catan gitye ka nongone i yo me kom, kit, ki tam.—Yakobo 4:7.
Luloc me wi Lobo ma Gitye i Kabedo me Polo
3. Angagi ma Catan okelo adegadega matek atika i komgi, dok nining?
3 Jehovah tito botwa kore ki kore kit ma en enongo lobo tye kwede ki i kabedone i polo. En omiyo ginanena bot lakwena Jon kun nyuto Catan calo “min kulu mo makwar.” En onongo dong oyubbe woko ni ka twere omyero ejwer Ker pa Meciya pa Lubanga ma onongo pud kiketo aketa cut i polo i mwaka 1914. Ka meno pe otwere, Catan okelo twon adegadega madit atika i kom luwang jo me Ker meno ma i lobo. (Niyabo 12:3, 4, 13, 17) Catan ocako lweny man nining? Otiyo ki luwange ma dano.
4. Teko pa gamente pa dano a ki bot nga, dok wan wangeyo meno nining?
4 Lacen kinyuto ki Jon lee tim mo ma tye ki wiye abiro ki tunge apar, lee meno onong tye ki twero i kom “kaka ducu, dano ducu ki leb-gu, wa rok mapatpat ducu.” Lee tim meno cung ka wang yub me wibye me wi lobo ducu. Kiniango Jon ni “Min kulu madit ca [Catan Lagoba-ni] omiyo tekone, kom kerre, ki twero madit ma en tye kwede bot lee meno.” (Niyabo 13:1, 2, 7) Ada, teko ki twero pa gamente pa dano a ki bot Catan. Pi meno, kit ma lakwena Paulo ocoyo, ‘luloc ma loyo wi lobo’ aye ada obedo “dul mony mogo maraco me cwiny ma tye i polo,” ma gitye ka telo gamente pa dano. Jo ducu ma gimito woro Jehovah mito guniang dit pa gin man.—Luka 4:5, 6.
5. Kitye ka coko luloc me wibye pi gin ango kombeddi?
5 Kadi bed luloc me wibye giwaco ni gin ludini, pe tye lobo mo ma minne i te loc pa Jehovah nyo i te Kabaka ma en ocimo, Kricito Yecu. Gin ducu gitye ka lwenyo lweny magwar me moko i locgi. I kare-ni, kit ma Niyabo onyuto kwede, “cen pa jok” tye ka coko luloc lobo i “mony i nino madit pa Lubanga Won Twer Ducu” i kabedo me Armagedon.—Niyabo 16:13, 14, 16; 19:17-19.
6. Pingo gwokke mitte wek pe kibitwa me cwako yub pa Catan?
6 Nino ducu, anyobanyoba me wibye, lok me lonyo me lobo, ki me dini, gudo kwo pa dano dok bedo ka poko kin dano. Dong yot mada pi dano me cwako tung ka mo i yoko wic magi—ki dog, nyo i yo mukene—cwak i kom lobo, rok, dul me leb, nyo rwom me kit me kwo ma ngat moni tye iye. Kadi bed dano pe odonyo i yoko wic moni atir atir, pol kare ginongo ni gitye ka cwako tung ka mo olo. Labongo paro anga nyo ngo ma gicwako, gin ada nongo gitye ka miyo cwak ki anga? Baibul tito kamaleng ni: “Lobo ducu tye i te loc pa Larac-ci.” (1 Jon 5:19) Dong, gin ango ma dano moni twero timone wek pe kibwole kacel ki jo mukene-ni? Cwako Ker pa Lubanga ki bedo labongo cwako tung ka mo i yoko wic ma i lobo keken aye gengo.—Jon 17:15, 16.
Yub me Ryeko pa Larac-ci
7. Ryeko pa Catan onen i ticce ki dini goba nining?
7 I kare mukato ni ducu, Catan otiyo ki aunauna me kom ki me dog me loko dano woko ki acel acel ki i woro me ada. En bene otiyo ki yo mogo ma okanne me ryeko tutwal—tic bwola i wi diro ki yub me ryeko. En otiyo ki dini goba i wi ryeko me keto lwak dano mapol i colpiny, ki miyo gin tamo ni gitye ka woro Lubanga. Pi bedo labongo ngec ma tye atir i kom Lubanga ki mar pi lok ada, tango ki lega ma tugu cwinygi romo ywayogi, nyo tic mogo madito romo yomo cwinygi. (2 Tecalonika 2:9, 10) Ento kicikowa ni kadiwa i kin jo ma yam kong gunywako woro me ada, “mogo bibwoto niyegi . . . , gicako lubo jogi ma gin lugoba, ki pwony pa cen maraco.” (1 Temceo 4:1) Meno timme nining?
8. Catan twero bitowa me donyo i dini goba nining kadi bed waworo Jehovah?
8 I wi ryeko, Larac-ci tiyo ki gorowa. Lworo dano mono pud tye diyowa? Ka kit meno, ci waromo ye dic pa wadiwa nyo jiraniwa me nywako timo tim ma ocakke ki i dini goba. Nyo wan luwakke ba? Ka kit meno, ci akemo oromo makowa, cwinywa oromo wang ka kiloko i wiwa, nyo ka jo mukene pe giye tamwa. (Carolok 15:10; 29:25; 1 Temceo 6:3, 4) Meka ka loko tamwa ma rwatte ki lanen pa Kricito, waromo tero itwa bot jo ma ‘bibedo ka yilo itwa ayila’ ma giwaco ni kwano Baibul ki kwo kwo maber mere romo. (2 Temceo 4:3) Kadi bed wadony i dul dini mukene nyo wamoko i kit diniwa-ni, pire pe tek bot Catan, tekke ka pe watye ka woro Jehovah i yo ma en onyuto i Lokke ki i kacokkene.
9. Catan tiyo ki lok me mit me cobo gin ma en mito i wi diro nining?
9 Catan bene miyo dano gicobo miti matir i yo marac i wi diro. En timo man i lok kom mitti me mit. Pi kwero kit pa Baibul, jo mapol gineno lok me buto i kin jo ma pe gunyomme calo cobo mitti matir me yomcwiny nyo calo yo me nyuto ni gin dong gidito. Ento jo ma dong gunyomme woko kono? Polgi timo abor. Dok kadi bed mit woko obed pe i keny, lwagi dano giyenyo keto nyom nyo pokke me wek gicak kwo dok ki ngat mukene. Mitti pa Catan tye me tic ki ryeko ma okanne me wek dano obed ki kwo ma kelo yomcwiny kombeddi, bwologi me cayo adwogi ma bino i komgi ki i kom jo mukene ento tutwalle i kom watgi ki Jehovah ki Wode.—1 Jo Korint 6:9, 10; Jo Galatia 6:7, 8.
10. Catan temme me dwoyo tamwa i kom tim gero ki caro caro nining?
10 Mitti mukene ma tye atir aye mitti me galowang. Ka watiyo kwede i yo maber ci weko wawinyo agonya i komwa, i tamwa ki cwinywa. Ento wan watimo gin ango ka Catan i wi ryeko, otiyo ki kare me galowang magi me temo kwanyo tamwa woko ki i kom Lubanga? Macalo labolle, wangeyo ni Jehovah dag tim caro caro ki gero. Ka cinema, cal ma i telebijon, nyo tuko ma kiyubo tye ka nyuto jammi magi, mono wabedo piny ci waneno jammi magi ducu? Ket bene i tammi ni, Catan bineno ni jammi magi gumedde ki doko rac ka kare me loro wiye i bur matut ma tere pe gik dong woto ki nyiko cok, “jo maraco ki jo ma lugoba gibimedde ki bedo marac makato kare, kun gibwolo dano, gin bene gibibwologi.” (2 Temceo 3:13; Niyabo 20:1-3) Pi meno kare ducu omyero wabed ma wagwokke i kom yub pa Catan.—Acakki 6:13; Jabuli 11:5; Jo Roma 1:24-32.
11. I kit yo ango ma ngat ma ngeyo lok ada i kom tim jokjok romo poto ka en pe obedo ma wange twolo?
11 Wan bene wangeyo ni jo ma gidonyo i kit tim me jokjok mo keken—tyeto gin ma anyim, tyet man ata-ni, nyo temme me lok ki jo muto—gubedo jo me kwer bot Jehovah. (Nwoyo Cik 18:10-12) Ka waketo meno i tam, pe wabitamo me cito bot ajwaki, dok ada pe wabijologi me timo ticgi-ni i pacowa. Ento pe wabiwinyogi ka gukatti i telebijon nyo i Intanet? Kadi bed pe waye yat ma oa ki bot ajwaka, nyo watweyo kit tol mogo i ngut cing lutino lukerre-wa, ki tam ni romo gwokogi ki i gin mo marac bo? Ka wangeyo ni Baibul kwero rogo dano, pud dok waromo cito bot ajoka wek orog ngat mo?—Jo Galatia 5:19-21.
12. (a) Kitiyo ki wer nining me wek wacak tam i kom gin ma wangeyo ni rac? (b) Kit bongo, yubo yer wic, nyo yo me lok nyuto mar pa ngat moni i kom jo ma Jehovah kwero kit me kwogi nining? (c) Gin ango ma mitte ki botwa ka pe wamito poto i owic me ryeko pa Catan?
12 Baibul waco ni abor ki tim caro caro ducu (ki cwiny marac) pe bene kilwong i komwa. (Jo Epeco 5:3-5) Ento mono ka wi lok magi girubo woko ki wer ma ywane mot ma mit, ma odde-ne cubu cwiny, nyo yokke ayoka kono? Wabicako poro dwan luwer ma giketo deyo i kom mit labongo nyom, tic ki jammi calo jayi, ki kit tim me bal mukene? Nyo kadi ka wangeyo ni omyero pe wapor kit yo me kwo pa jo ma gitimo kit jammi magi, mono wanyute ni wamarogi ki poro kit ma girukke, giyubo ki yer wigi, nyo yo ma giloko kwede? Ryeko ma Catan tiyo kwede wek dano gulub kit yo me tamme mutoppi dong pud rac ya! (2 Jo Korint 4:3, 4) Me gwokke wek pe ipot i yub me dirone, myero wakwer wot i kit me lobo. Omyero waket i tamwa angagi ma “loyo wi lobo ducu i kare man me colpiny,” ci walweny matek i kom tekogi.—1 Petero 5:8.
Jammi ma Mitte me Bedo Ngat ma Oloyo
13. Twere pi wan ki acel acel nining, ki rocwa-ni, me loyo lobo ma Catan tye ka loyone-ni?
13 Yecu owaco bot lukwenane ma peya oto, ni: “Wudi cwinywu, an dong aloyo lobo.” (Jon 16:33) Gin bene gitwero bedo kit meno. Lacen i nge mwaki 60, lakwena Jon ocoyo ni: “Anga mono ma loyo lobo? Pe ngat ma ye ni, Yecu aye Wod pa Lubanga?” (1 Jon 5:5) Niye ma kit meno nyute i winyo cik pa Yecu ki dok jenge i Lok pa Lubanga, calo kit ma Yecu otimo. Gin ango mukene ma dok mitte? Bedo ki wat ma cok ki kacokke ma en aye Lawiye. Kace watimo bal, omyero wakun balwa dok wayeny yo ma Lubanga weko kwede bal ma cung i kom gin tyer pa Yecu. I yo ma kit meno, kadi wan luroc dok watimo gin marac, wan bene watwero bedo jo ma oloyo.—Jabuli 130:3, 4.
14. Kwan Jo Epeco 6:13-17, ci iti ki lapeny ki ginacoya ma kimiyo i paragraf man macalo gin me nyammo lok i kom kony ma a ki i jammi aruka-ni ki acel acel.
14 Me loyo, omyero waruk “jami lweny ducu ma Lubanga miyo,” pe waca kit gin mo iye. Tim ber iyab Baibul i Jo Epeco 6:13-17, ci ikwan kit ma kitito kwede pi jammi aruka meno. Ci, ka itye ka gamo lapeny ma tye piny kany, tam kit ma itwero nongo kwede kony ki i gwok ma gin aruka man miyo ki acel acel.
‘Tweyo pyer woko ki ada’
Kadi bed wangeyo ada, kwan kare ducu, tamo tam matut i kom ada me Baibul, ki bedo i kacokke konyowa nining? (1 Jo Korint 10:12, 13; 2 Jo Korint 13:5; Jo Pilipi 4:8, 9)
‘Wek kit ma atir obed nyonyo me gengo kor’
Rwom man me kit atir-ri obedo pa anga? (Niyabo 15:3)
Nyut kit ma kwero lubo yo ma atir pa Jehovah miyo awano me cwiny bot dano. (Nwoyo Cik 7:3, 4; 1 Camuel 15:22, 23)
“Lok me kwena maber me kuc ma bedo macalo war”
Obedo gin me gwokke pi wan nining me miyo tyenwa bedo ka tic me terowa me lok ki dano pi jammi ma Lubanga omiyo pi kuc? (Jabuli 73:2, 3; Jo Roma 10:15; 1 Temceo 5:13)
“Niye aye myero obed kwotwu”
Ka watye ki niye ma ocung matek, wabitimo gin ango ka wa rwatte ki yelle ma kitye ka keto-ne wek wabed ki akalakala nyo lworo? (2 Luker 6:15-17; 2 Temceo 1:12)
“Larre aye obed tok nyonyo”
Gen me larre konyo dano me gengo poto i owic me bedo ki mitti me maro jammi nining? (1 Temceo 6:7-10, 19)
‘Pala lucwan pa cwiny maleng’
Wan omyero wajenge i kom ngo me loyo lweny me cwiny ma poto i komwa nyo i kom jo mukene? (Jabuli 119:98; Carolok 3:5, 6; Matayo 4:3, 4)
Ngo mukene ma pire tek me loyo lweny me cwiny? Omyero kitim tyen kidi? Pi anga? (Jo Epeco 6:18, 19)
15. Watwero bedo ma cwinywa mito lwenyo lweny me cwiny nining?
15 Macalo cirikali pa Kricito, wan watye dul mony madit ma tye ka lwenyo lweny me cwiny. Ka wabedo ma wangwa twolo dok watiyo ki jammi aruka me lweny ma oa ki bot Lubanga, pe wabibedo jo ma to i lweny. Ma kaka meno, wabibedo me kony bot lutic pa Lubanga luwotwa. Wabibedo ma watere dok ma cwinywa mito lweny, yweko pi kwena maber me Ker pa Meciya pa Lubanga, gamente me polo ma Catan tye ka jemo marac tutwal i kome-ni.
Nyammo wi Lok ma Kineno
• Pingo luwor Jehovah gibedo ma pe gicwako tung ka mo i yoko wic me lobo?
• Yub me diro ma Catan tiyo kwede me turo Lukricitayo aye ngo?
• Jammi aruka me cwiny ma Lubanga miyo gwokowa i lwenywa me cwiny nining?
[Cal ma tye i pot karatac 76]
Kitye ka coko lobe i Armagedon