Tika Lucaden pa Jehovah Gubedo Purutanti?
Pe. Lucaden pa Jehovah gubedo Lukricitayo, ento pe gubedo but dini me Purutanti. Pingo?
Nyig lok ni Purutanti gonye ni “dini ma gijemo i kom Katoli.” Kadi bedi ni Lucaden pa Jehovah pe giye pwony pa Katoli, ento pe wabedo Purutanti pi tyen lok magi:
Pwony mapol pa Purutanti pe rwatte ki ngo ma Baibul pwonyo. Me labolle, Baibul pwonyo ni “Lubanga tye acel” keken ento pe ni Lubanga tye adek i i acel nyo ni tye Triniti. (1 Temceo 2:5; Jon 14:28) Dok Baibul bene nyuto ka maleng ni Lubanga bijwero lutim maraco woko, ento pe ni bipwodogi i mac me kapiny.—Jabuli 37:9; 2 Jo Tecalonika 1:9.
Pe wajemo i kom Katoli nyo watemme me loko pwonygi nyo pa dini mo keken. Me ka meno, watito kwena maber me Ker pa Lubanga, dok watute me konyo dano wek gubed ki niye i kom kwena meno. (Matayo 24:14; 28:19, 20) Mitiwa tye me pwonyo jo ma gimito ngeyo lok ada i kom Lubanga kacel ki lokke, Baibul ento pe me loko pwony me dini mo keken.—Jo Kolocai 1:9, 10; 2 Temceo 2:24, 25.