Kony pi Mon ma Kiunogi

Meno aye kit ma pwony ma wiye tye ni “Gin ma Baibul Waco i kom Ber Bedo pa Mon,” cakke kwede. Ka idiyo link ma tye i agikki me pwony meno, itwero kwanyo PDF me pwony man, ma itwero rudone i printa ci ibano iye doko trak ma pote tye angwen. Laminwa mo ma nyinge Stacy ma bedo i lobo Amerika owaco ni: “Arudo kopi mapol ci i ngeye, an ki lamego mukene watero trak magi i kabedo mo ma tye i wang ticwa ma kigwoko iye mon ma kiunogi.”

Dako mo ma tiyo kunnu openyo lumegiwa ka gitwero medo kopi mukene wek kipok bot mon ducu ma gibedo kunnu. Macalo adwogine, lumege aryo magi gupoko trak ma romo 40 mukene kacel ki kad me jw.org ma romo 30. I lim mukene doki, dako ma loyo kabedo meno openyo Lucaden ni gunyut ki mon ma gibedo kunnu kit ma wakwano kwede Baibul ki dano.

Stacy kacel ki lumege aryo mukene gucito bene i kabedo mukene ma kigwoko iye mon ma kiunogi dok ki kunnu kigamo kopi abic me trak man dok kipenyo pi mukene. Dako mo ma tiyo i kabedo meno owaco ni: “Buk man bikonyo mon ma gibedo kany adada.” En omedo ni, “Wamito lok man adada.” I kare ma lumegiwa gudok cen, mon mogo ma gibedo kunnu gunyuto miti me ngeyo kit ma kikwano kwede Baibul ki dano, dok mon aryo i kingi guwaco ni gimito cito i cokke i Ot me Ker.

Stacy owaco ni: “Wabedo ki ur adada me neno kit ma cwiny dano obedo yom kwede me kwano pwony man. Ka irudo dok ibano trak man, ci weko bedo yot adada me nywako kwena me Ker pa Lubanga ki mon ma kiunogi. Ogudo cwinywa adada me neno kit ma cwiny dano obedo yom kwede me nongo ngec man. Watye ka kuro neno kit ma Jehovah bikonyowa kwede ka wamedde ki nywako kwena maber-ri ki mon magi.”