Tika Onongo Ingeyo?

I cencwari me acel, lulamdog ma gitiyo i ot pa Lubanga onongo gionyo remo pa lee ma kityero nining?

MWAKA ki mwaka, i kare pa Luicrael macon, lulamdog onongo gityero lee alip mapol i wi keno tyer ma i ot pa Lubanga. Lacoc mo ma nyinge Josephus ma ocoyo lok me tekwaro pa Lujudaya owaco ni i kwer me Kato onongo kityero romi makato 250,000 kulu macalo gitum. Pi meno, remo lee onongo bedo madwong adada dok onongo mitte ni kiony woko. (Levi 1:​10, 11; Wel 28:​16, 19) Dong, remo meno onongo kionyo nining?

Lucayan ma gigolo jami ma i te ngom gugolo kabedo macok ki ot pa Lubanga ma onongo tye i kare pa Yecu. Gin gunongo wang otul mapol ma onongo remo mol ki iye nia ki i ot pa Lubanga.

Nen kong jami aryo ma onongo weko remo mol oyotoyot dok keno tyer bedo maleng:

• Bur onongo tye me onyo remo i te keno tyer: Buk mo ma kilwongo ni Mishnaha moko lok man. Buk meno owaco ni: “I twok keno tyer acel, onongo tye iye bur aryo. Remo pa lee ma kityero kacel ki pii ma kilwoko ki keno tyer onongo gimol i bur magi ci donyo i wang otul ma cito wa i Nota me Kidron.”

  Buk mo ma kicoyo i karewa-ni ma loko i kom tekwaro pa Lujudaya bene moko ni kwed ma lucayan gutimo ma nyuto ni onongo kitiyo ki bur kacel ki wang otul me mol pa remo tye ada.

• Pii onongo tye madwong: Lulamdog onongo gitiyo ki pii madwong me lwoko keno tyer dok man onongo konyo weko remo mol maber i wang otul magi. Pii ma lulamdog onongo gitiyo kwede onongo a ki i boma me Jerucalem. Onongo tye wang otul mapol ma kicweyo kacel ki bur mapatpat me gwoko pii ma konyo me mol pa pii nia ki i boma me Jerucalem nio i ot pa Lubanga. Lacayan mo ma golo jami ma i te ngom ma nyinge Joseph Patrich owaco ni: “I kare meno, onongo pe tye ot pa lubange mo keken ma onongo tye ki yo maber loyo me kelo pii kacel ki gwoko lengo calo ot pa Lubanga ma i Jerucalem.”