Yub Cwinyi ma Peya Icako Kwan

Ka watye ka kwano Baibul, wamito ni jami ma wapwonyo madok i kom Jehovah ogud cwinywa. Ejira owekiwa lanen maber adada, pien en “yam oketo cwinye ka kwano ki niang cik pa [Jehovah].” (Ejira 7:10) Watwero lubo lanen pa Ejira nining?

Legi. Ma peya icako kwanni, omyero kong icak ki lega. Leg Jehovah wek okonyi iniang dok iket i tic gin ma ipwonyo.—Jab. 119: 18, 34.

Bed ngat mamwol. Lubanga kano woko lok ada ki bot jo ma luwakke, dok ma gitamo ni pe gimito konnye me niang Baibul. (Luka 10:21) Pe wamito ni wakwan me nyutte bot dano ni watye ki ngec. Dok ka waniang i kom gin mo ma omyero watim iye alokaloka, ci omyero wanyut mwolo ki timo alokaloka meno labongo galle.

Winy werwa mo acel. Wer twero gudo cwinywa ki tamwa. Dong ka iwinyo werwa mo acel ma peya icako kwanni, ci bikonyi me keto cwinyi i kom Jehovah wek jami ma ibipwonyo ogud cwinyi.