Hulda Ocobo Yubbe

TYE lumegiwa adek mo ma gibedo i cula nam mo matidi ma kilwongo ni Sangir Besar i lobo Indonesia. Mwaki mogo angec onongo gitiyo kacel i teng pii me cula nam meno. Gingene adada i cula nam meno pi ticgi me pwony​—konyo dano me niang Baibul. Ento i wang-ngi, onongo gitye ka tiyo tic mapat.

Mukwongo, onongo giwoto i dye pii ka yenyo got madongo ci gikelo i wi tera. Got mukene onongo gidongo girom ki odilo. I nge meno, lumegiwa magi onongo gibedo i wi kom otok ci gityero got magi matinotino. I nge tyerone gicoko i baket ci gitingo gitero ka ma gibedo iye. Ci lacen gipiko got magi i gutiya wek lori obin oting wek kiti kwede me yubo gudi.

Laminwa acel i kin lumegiwa adek magi nyinge Hulda. En onongo tiyo tic man pi cawa malac makato lumegiwa mukene-ni. Pol kare en tiyo ki cente ma nongo ki i tic man me wilo jami ma mitte pi lupacone. Ento i wang-ngi, en onongo mito gwoko cente wek ecob yubbe. En onongo mito wilo tabulet wek ebed ki kare me tic ki JW Library^® app. Hulda onongo ngeyo ni vidio ki bukke ma i JW Library^® app bikonye me tito kwena bot jo mukene kacel ki medo rwom me kwanne pire kene.

Hulda onongo tiyo tic me goyo got kare ki kare ento pi dwe ma romo acel ki nucu en omedo cawa aryo mukene i wi cawa ma onongo en tero i tic man. Got ma en ogoyo i kare meno onongo romo pongo lori mo matidi. Lacen, en ojogo cente ma onongo romo wilo tabulet.

Hulda owaco ni, “Kadi bed onongo aol adada dok koma ducu lit macalo adwogi me goyo got, wiya owil woko oyotoyot i kare ma awilo tabuletta dok okonya me cubo ticca me pwony maber kacel ki yubbe pi cokke i yo mayot.” En bene owaco ni tabulet meno okonye adada me kubbe pi cokke kacel ki tito kwena i kare me two Korona. Wan ducu cwinywa yom kacel ki Hulda ni ocobo yubbe.