Tika Onongo Ingeyo?

Pingo onongo Luicrael me kare macon giculo lim me nyom?

I KARE me Baibul, lanyom ma laco nyo jo me ganggi onongo giculo lim bot jo gang pa nyako ma en binyomo i kare ma gumoko me nyomme. Lim man onongo nen calo tye iye jami me wel, lee, nyo cente. I kine mukene, onongo kiculo ki tiyo tic, calo kit ma Yakobo otimo kwede i kare ma oye tic pi won Lakeri pi mwaka abiro wek kimine Lakeri me anyoma. (Acak. 29:17, 18, 20) Lim me nyom onongo kiculo pi tyen lok ango?

Carol Meyers, lakwan ma okwano Baibul i yo matut owaco ni: “Lim me nyom onongo twero bedo calo cul bot jo gang pa nyako pi tic ma onongo yam nyako-ni tiyo, ma meno onongo pire tek adada i gangi ma jone gubedo lupwur.” Lim man onongo bene jingo wat i kin jo gang pa nyako ki jo gang pa laco. Jo me gangi aryo magi onongo gitwero konnye i kingi i kare me peko. Medo i kom meno, lim me nyom onongo moko ni nyako moni dong kitongo keny i kome dok ma pe orii en bia woko ki i te gwok pa wonne ci dok i te gwok pa cware.

Culo lim me nyom onongo pe te lokke ni dako obedo gin ma kitwero wilone nyo catone. Buk ma wiye tye ni Ancient Israel—Its Life and Institutions waco ni: “Tim man me culo cente, nyo lim mukene bot jo me gang pa nyako labongo keng, onongo weko nyom pa Luicrael nen calo kitye ka wilo nyako awila. Ento me ka meno, gin onongo gineno lim me nyom calo cente ma kimiyo bot jo gang pa nyako me culo ka wang ticce ento pe me wilo nyako-ni.”

I kare-ni, i lobe mukene, dano pud gilubo tekwaro me culo lim pi nyomo nyako. Ka lunyodo ma Lukricitayo gupenyo pi lim me nyom, ‘giweko jo ducu ngeyo niango ma gitye kwede’ kun pe gipenyo pi jami madwong mukato kare woko. (Pil. 4:5; 1 Kor. 10:32, 33) I yo ma kit man, ginyuto ni gin pe gubedo “lumar lim,” nyo luworo. (2 Tem. 3:2) Medo i kom meno, ka lunyodo ma Lukricitayo pe gupenyo pi lim madwong mukato kare woko, pe bimitte ni lanyom ma laco odir nyom anyim wang ma en onongo cente muromo me culo lim man. Nyo lanyom pe biwinyo calo myero ewek ticce macalo painia woko pien myero enong dog tic ma etiyo iye nino ducu wek enong cente muromo me culo lim ma kingolo madit-ti.

I but lobo mukene, cik pa gamente doro wel lim me nyom ma omyero kicul. Ka tye kit meno, ci lunywal ma Lukricitayo myero gulub cik magi. Pingo? Pien Lok pa Lubanga waco ni Lakricitayo “myero owiny luloc ma giloye” dok olub cik ma pe turo cik pa Lubanga.—Rom. 13:1; Tic 5:29.