Watiyu Kacel me Tito Kwena i Wang Tic ma Kiloko Iye Leb Mapat pat

Dano pol kare gijolo kwena me Ker-ri oyotoyot ka guwinyo i leb pengi. Twero bedo ni meno aye gin mumiyo i Pentekote me mwaka 33 K.M., Jehovah oyubo ni ‘Lujudaya ma gia ki i rok ducu ma tye i wi lobo’ guwiny kwena maber-ri i ‘leb tugi kikome ma kinywalogi iye,’ kadi bed onongo giloko leb mukene ma ngene tutwal, calo leb Ibru nyo Grik. (Tic 2:5, 8) I kabedo ma kiloko iye leb mapat pat i kareni, kacokke ma gibedo ki cokkegi i leb mapat pat guromo bedo ki wang tic ma cokcok. Lutit kwena ma i kacokke magi gitwero tic kacel nining me miyo caden bot jo ducu kun pe ginwoyo wang tic ma kacokke moni dong otyeko, wek pe ocwer cwiny jo ma gibedo i wang tic meno?

• 

  Lok ki kacokke mukene (Car 15:22): Luneno wi tic omyero gulok ki luwotgi me nongo yo maber loyo ma kacokkegi twero tic kwede me tito kwena maber-ri. Ka wang ticgi nok, kacokke ma gitito kwena i leb mukene guromo bedo ki miti ni wukal odi ma tye i wang ticgi. Ento, ka pe gitwero tyeko wang ticgi kare ki kare pien ni dit, ci guromo bedo ki miti ni pe wukal ot mo keken ento wunianggi ka ngat mo ma i wang ticgi onyuto miti. (od-E 93 para. 37) Onyo guromo penyo kacokkewu me konyogi nongo jo ma loko leb me kacokkegi dok ma adrecgi kitwero kobone i wang ticgi. (km 7/12 5, bok) Bed ma ingeyo ni i kine mukene, nongo kiloko leb makato acel i odi mogo. Omyero kilub cik ma doro kit me tic ki ngec madok i kom lutedero ka kitye ka keto yub me tiyo wang tic moni.

• 

  Wuti kacel (Ep 4:16): Lub tira mo keken ma lanen wi tic omiyo. Tika itye ka kwano Baibul ki ngat mo ma tiyo ki leb mapat ki leb me kacokkewu? Latin kwan man oromo dongo oyotoyot ka imiyo bot ngat mo ma tye i kacokke nyo gurup ma tiyo ki lebe.

• 

  Yubbe (Car 15:28; 16:1): Ka ce rwod ot mo i wang ticwu loko leb mapat, tute matek me nywako kwena maber-ri kwede. Itwero yubbe kun itamo i kom leb ma dano me wang ticwu giloko. Kwany Baibul ki vidio me leb meno ci iket i cim nyo tabulet-ti. Itwero tic ki JW Language app me pwonyo mot i leb mogo.