Wulub Lanen pa Lunebi—Kabakuk
1. Pingo watwero niang kit ma lanebi Kabakuk owinyo kwede?
1 Ka tim maraco medde i loboni, watwero winyo calo Kabakuk, ma openyo Jehovah ni: “Pingo imiyo aneno tim maraco kun wanga neno tim aranyi?” (Kab. 1:3; 2 Tem. 3:1, 13) Lwodo lok i kom kwena pa Kabakuk ki lanenne me niye twero konyowa me diyo cwinywa ka wakuro nino me ngolo kop pa Jehovah.—2 Pet. 3:7.
2. I yo ango ma watwero nyuto ni watye ka kwo ki niye i kareni?
2 En Okwo ki Niye: Ma ka ye ni jami maraco ma tye ka timme obal cwinye woko, Kabakuk omedde ki bedo ma wange twolo i yo me cwiny kun tiyo matek. (Kab. 2:1) Jehovah omoko bot lanebine ni lok pa Lubanga bicobbe i karene kikome ki dok ni “ngat ma kite atir bibedo kwo pi niyene i kom Lubanga.” (Kab. 2:2-4) Man gudo Lukricitayo ma gitye ka kwo i kare me agikki nining? Gin ma pire tek loyo ngeyo awene ma agikki piny bibino iye aye bedo labongo akalakala mo ni bibino. Niye konyowa me bedo ma wangwa twolo kun waketo tic me pwony bedo mukwongo.—Ibru 10:38, 39.
3. Pingo myero wamedde ki bedo ki yomcwiny i ticwa pi Jehovah?
3 Bed ki Yomcwiny i Jehovah: Ka Gog ma tye i lobo Magog ooto lweny i kom jo pa Jehovah, kibitemo niyewa. (Ejek. 38:2, 10-12) Lweny kelo kwo matek, kadi wa bot jo ma giloyo lwenye. Cam romo doko nok, dano giromo rwenyo jamigi, dok rwom me kwo bedo lapiny. Wabidok iye nining ka peko odiyowa? Kabakuk ongeyo ni peko bibedo tye, ci en omoko tamme me cung matek me tic ki yomcwiny pi Jehovah (Kab. 3:16-19) “Yomcwiny pa [Jehovah]” bene bikonyowa me ciro peko ma tye anyim.—Nek. 8:10; Ibru 12:2.
4. Yomcwiny ango ma watwero bedo kwede i kareni ki i kare me anyim?
4 Jo ma Jehovah bigwokogi i ninone me ngolo kop gibimedde ki nongo pwony i kom yo pa Lubanga. (Kab. 2:14) Jo ma kibicerogi bene gibipwonyo lok kom Jehovah. Kadi wa i kareni, watiyu wunu ki kare mo keken ma tye me lok i kom Jehovah ki ticce ducu me aura!—Jab. 34:1; 71:17.