Yubbe Mitte Wek Wabed Lupwonye ma Ludiro

Kipenyo Yecu lapeny i kom kit me nongo kwo ma pe tum tyen aryo mapatpat, ento en ogamo lapeny meno i yo mapatpat, ma lubbe ki miti pa ngat ma openye. (Luka 10:25-28; 18:18-20) Pi man, kadi bed wangeyo buk ma watiyo kwede me kwano Baibul maber, myero wayubbe con kun bene watamo pi latin kwanwa me Baibul. Pwony ango ma en tye ka tute me niang iye? Wang Baibul mene ma myero wakwan i kin ma kiketo-ni? Watwero kwano paragraf adi i cawa me kwan ki latin kwan? Ka twere myero bene wayub lapor, watit tyen lok moni , nyo wati ki lapeny mapol wek okony latin kwan me niang. Medo i kom meno, kit macalo Jehovah aye weko kodi me ada dongo i cwiny latin kwan, bedo ber ka walego, kun wakwayo Jehovah wek ogo laane i tutewa me konyo latin kwan i yo me cwiny.​—1 Kor. 3:6; Yak. 1:5.