Lok pa Lubanga Tika Tye ki Teko i Kwoni me Nino Ducu?

Kwano Baibul nino ducu miyo lwitwa ‘donyo cung matek’ dok “wacung matek i niye.” (Kol. 2:6, 7) Ento,wek Lok pa Jehovah obed ki teko i kwowa, myero wabed ka lwodone dok waket i tic cik ma wakwano. (Ibru 4:12; Yak. 1:22-25) Yocwa 1:8 onyuto yo adek ma gitiyo i kit ma myero wakwan kwede: (1) Kwan Lok pa Lubanga “dyeceng ki dyewor.” (2) Kwan kun ‘ilwodo ki i cwinyi’, ma te lokke ni wakwan ki diro kun walwodo ka ma jami moni otimme iye ki kit ma otimme kwede. (3) Ket tek dok “igwokke ka lubo gin ducu ma gicoyo iye.” Keto tam magi i tic bimiyo ‘nyimi bedo maleng, dok “ticci ducu bicobbe kakare” i kwoni me nino ducu.