Kit me Gudo Cwiny Jo ma Wapwonyogi
1. Adwogi ango ma pwony pa Yecu okelo i cwiny lupwonyene?
1 Yecu Kricito ogudo cwiny jo ma gubedo ka winyo pwonye. l nino mo acel, cwiny lukwenane obedo ka “pukke” lacen ma en otito tyen lok me Ginacoya mo botgi. (Luka 24:32) Kit macalo bedo luwiny bot Lubanga myero oa ki i cwinywa, watwero tugo tam pa jo ma wapwonyogi wek guket alokaloka i kwogi nining?—Rom. 6:17.
2. Diro ki niango konyo me gudo cwiny dano moni nining?
2 Ti ki Diro dok ki Niango: Bot jo mapol, tito botgi atita keken gin maber ki marac pe twero gudo cwinygi me loko kwogi. Ki lok ada, tic ki wang ginacoya mapol me nyuto botgi goba ma tye i dinigi dok twero dirogi ka mabor ki lok me ada. Me tugo tam pa ngat moni, myero mukwongo kong watiyu ki niango me niang tyen lok mumiyo en ye gin moni ki ngo muweko en timo jami kit meno. Tic ki diro kun watiyo ki lapeny mogo ma wayero maber twero cuko cwinygi me tito tamgi kacel ki jami ducu ma tye i cwinygi. (Car. 20:5) Inge meno, dong watwero yero ngec mogo ma oporre ki i Lok pa Lubanga ma twero gudo cwinygi. Pi meno myero wanyutu mar ki diyo cwiny bot jo ma watito kwena botgi. (Car. 25:15) Wi myero opo ni dongo pa dano i yo me cwiny tero kare mapat pat. Myero wawek kare wek cwiny pa Jehovah aye olok tam ki tic pa dano meno.—Mar. 4:26-29.
3. Watwero konyo jo ma wapwonyogi me dongo kit ma oporre nining?
3 Konygi me Dongo kit Mabeco: Wang Ginacoya mogo ma tito pi ber ki mar pa Jehovah twero konyo jo ma wapwonyogi me dongo kit mabeco magi. Watwero tic ki Ginacoya calo Jabuli 139:1-4 nyo Luka 12:6, 7 me nyuto mar matut ma Lubanga tye kwede i kom wan ki acel acel. Ka inen dano meno odongo pwocce pi kica pa Jehovah ma pe wapore pire-ni, ci mar ki mitine me woro Lubanga twero dongo. (Rom. 5:6-8; 1 Jon 4:19) Dok bene, ka guniang ni kitgi twero gudo kit ma Jehovah winyo kwede, ci gicako timo jami i yo mupore dok i yo ma yomo cwinye.—Jab. 78:40, 41; Car. 23:15.
4. Ka watye i ticwa me pwony, watwero nyutu woro pi twero ma ngat moni tye kwede me moko tamme pire kene nining?
4 Jehovah pe diyo dano me lubo cikke. Ma ka meno, en miyo giniang ni obedo me ryeko me lubo tira ma a ki bote. (Ic. 48:17, 18) Walubo lanen pa Jehovah ka wapwonyo i yo ma konyogi me moko tam matir pigi kengi. Ka ngat mo oye pire kene me loko kwone ci bikelo adwogi maber marii. (Rom. 12:2) Man bene nyikkogi cok ki “ngat ma ngiyo cwiny dano,” Jehovah.—Car. 17:3.