Bok Me Lapeny

◼ Lutit kwena mono myero guti ki Intanet me miyo caden nyo me kwano Baibul ki jo ma pe gingeyogi, ma gibedo i lobo mukene?

Lutit kwena mukene gutiyo ki Intanet me nongo lutino kwan me Baibul i lobbe ma kigengo iye ticwa nyo ka ma lutit kwena nok iye. I kabedo mogo, tic man onyako nyige dok adwogi maber onen iye. Ento, peko romo bedo tye ka lutit kwena gitiyo ki e-mail nyo ginywako lok i Intanet ki dano ma pe gingeyo. (Nen Ticwa Me Ker me Julai 2007, pot 3.) Kadi bed gitye ki miti me tito kwena me Kerri bot jo ma cwinygi atir, nywako lok ma kit meno twero weko omego nyo lamego mako lirem ki jo maraco, nyo jo mungak bene. (1 Kor. 1:19-25; Kol. 2:8) Medo i kom meno, i lobbe ma kigengo iye ticwa me Kerri, e-mail ducu ma donyo i lobo meno nongo luloc lobo kong gikwedo. Te lokke ni kubbe ma kit meno twero keto kwo pa omege ki lumege ka ma ocek. Pi man, lutit kwena pe myero guti ki Intanet me yenyo dano me lobbe mukene me tito botgi lok me kwena maber.

Nikwanyo ka jang gang kalwa owacci watim meno, ka watito kwena ma pe wayubbe iye bot ngat ma oa ki i lobo ma woko ci obino ka limo lobowa, pe myero wamedde ki dongo miti pa dano meno ka odok cen tugi. Watwero nyutte kit me tic ki jw.org me nongo ngec mukene nyo kit me coyo bot jang gang kal ma cok kwede. Watwero bene cuko cwinye me yenyo Ot me Ker ma tye cok ki pacone kunu. Romo bedo ni Ot me Ker peke i lobo mogo. Ka dano meno tye ki miti ni Lucaden gubin gulimme i pacone, myero wapong fom me Please Follow Up (S-43) dok wami bot karan me kacokke, ci en bitic ki jw.org me cwalone. Jang gang kal ma neno wi tic i lobo ma dano man kwo iye aye tye ki ngec muromo i kom kwo me kabedo meno dok gin aye gupore me miyo bote kony i yo me cwiny.​—Nen Ticwa Me Ker me Juni 2014 pot 7, ki Ticwa Me Ker me Novemba 2011 pot 2.

Ka dano mo ma watye ka nywako lok kwede kombeddi okobo woko i lobo mukene nyo watye ka kwan ki latin kwan ma tye i lobo mukene ma wangeyo ki i Intanet keken, bedo ber ka walubo tam ma kimiyo malo-ni. Ento, watwero medde ki dongo mitine nio ka latit kwena me kabedo meno onongo kom latin kwan-ni. Ka dano meno bedo i lobo ma kigengo iye ticwa, myero wati ki diro ka wanyamo pwony me Baibul kun watiyo ki cim, waraga, nyo jami calo Intanet.​—Mat. 10:16.