Nywak ‘Jami Mabeco’ ki Gwoko Welo (Mat. 12:35a)

Labongo akalakala mo, wan ducu wamito nywako ‘jami mabeco’ ki jo mukene kun ‘waketo cwinywa ka gwoko welo.’ (Rom. 12:13) Kimiyo tira bot luelda me telo yo i timo man ki miyo cente me wot kacel ki cam pi luneno ma gibino ka lim. Ento, oromo bedo ni walworo gwoko welo pien ni wabedo lucan, nyo walworo jolo jo mukene i paciwa. Lubo tira ma Yecu omiyo bot Marita twero konyowa me loyo lworo meno. (Luka 10:39-42) En onyuto ni “dul maber” me gwoko welo obedo boko lok ki cuko cwiny, ento pe obedo cam ma yubone tek nyo ot ma tye ki jami mapol. Ka waketo tira meno i tic, ci watwero nywako ‘jami mabeco’ ki omegiwa kit ma Lok pa Lubanga mito ni watim.​—3 Jon 5-8.