Ti ki Kare ma Onen Boti me Tito Kwena me Ker!
1. Pwony ango ma watwero nongone ki i lanen pa Daudi?
1 Kabaka Daudi obedo ngat mo ma onongo pe ye ni gin mo odwok cwinye piny. Me laporre, Daudi onongo mito gero ot pi Jehovah. I kare ma kigenge me timone, Daudi oloko yubbe ci okonyo me yubo jami ma mitte wek Solomon oger ot me woro. (1 Luker 8:17-19; 1 Tekwaro 29:3-9) Me ka tam tutwal i kom jami ma en pe twero timone, en olungo tamme i timo jami ma en twero timone. Wan watwero lubo lanen pa Daudi nining ka watye ka yenyo yo me tito kwena me Ker-ri?
2. Watwero ngiyo kit ma wakwo kwede me niang gin ango?
2 Tim Gin ma Itwero: Jo mapol gudwoko rwom me kwogi piny wek gidony i tic calo painia pi tutuno nyo painia marii. (Mat. 6:22) In itwero lubo lanengi? Ka itye ka neno kit ma kwoni tye kwede kun ilego iye, iromo neno ni ‘kiyabo yo malac boti me tiyo tic matek.’ Ka tye kumeno, ci ti maber ki kare meno!—1 Kor. 16:8, 9.
3. Kare me tito kwena ango ma twero nen botwa ma watwero tic kwede ka kit me kwowa pe ye ni wati calo painia?
3 Ento ka kit ma itye kwede gengi me tic calo painia kono? Pe ica yo mukene ma nongo tye. Me laporre, ka dog ticci miyo irwatte ki jo ma pe gubedo luye, pingo pe iti ki kare ma onen me tito kwena botgi? Nyo ka komi lit, tika itwero tic ki kare ma onen me tito kwena bot ludaktar? Wi opo ni tye yub ma kiketo pi jo ma kerogi me tic nok pien mwakagi dit nyo gitwo matek, me miyo ripot me dakika 15 ma kimedo i kom macon. Ka itye ka pongo ripotti me dwe moni, wi pe owil ki keto cawa ma itiyo i miyo caden ma pe iyubbe iye kacel ki ginakwana ma imiyogi, ma man tye iye trak ki karatac me lwongo pi Nipo ki gure madito. Twero bedo me ur boti me neno kit ma dakika ma itiyo manok-ki twero ribbe doko dit!
4. Tam ango ma dong ityeko mokone?
4 Kadi bed kit me kwowa tye ningo, omyero watiyu ki kare ma onen me tito kwena maber-ri. Man bimiyo wabedo ki yomcwiny me ngeyo ni watye ka yelle i yo ducu me tic pi Ker-ri.—Mar. 14:8; Luka 21:2-4.