Dongo Dirowa i Tic me Pwony—Kit me Cako Lok me Miyo Caden ma Pe Iyubbe Iye

Gin Mumiyo Pire Tek: Ka watye ka nywako pwony i ot ki ot, pol kare wanongo ni jo mapol gipeke paco. Ento waromo rwatte kwedgi ka ma giito iye giwot, ka ma gikuro iye dokto, ka wil, i cukul nyo i dog ticgi, ki dong i kabedo mo mukene. Obedo miti pa Jehovah ni jo ducu gunong larre. (1 Tem. 2:3, 4) Ka wamito miyo caden botgi omyero wan aye wacak lok kwedgi.

Kit me Timone:

Yer maber. Ngat meno mono nyuto cwiny me lirem dok mito lok? Tika tye agonya me boko lok? Lutit kwena mogo kong gineno wang ngat meno ci gibunyo kwede. Ka en bene obwunyo, ci gicako boko lok kwede.
Leg lega macek lalingling ka lworo me cako lok tye ka maki.—Nek. 2:4; Tic 4:29.
Cak ki lok manok calo moto ngat meno. Yecu pe ocako lok bot dako Lacamaria ki lok i kom Ker-ri. (Jon 4:7) I kine mukene, wuromo cako lok ki pwoyo en ni: “Lutinoni kitgi beco ba!” Penyo lapeny obedo yo mukene me cako lok: “Laworo tika iwinyo lok angeyo mukatti i redio?”
Ka dong wucako nywako lok, yeny yo me lok i kom kwena maber-ri, ento pe irune. Wek lokwu owot i yo ma weko en bedo agonya. Iromo waco gin mo ma gudo cwinye dok miyo en penyo lapeny. Me labolle, ka wutye ka lok i kom jo me ot, ci itwero wacci, “Anongo tira mo ma genne ma kwako gwoko lutino.” Ka wutye ka lok i kom lok angeya iromo wacci, “Cokcok-ki olo akwano kwena mo maber.” Pe cwinyi otur ka ce lokwu ogik ma peya imiyo caden mo.
Wot ki trak nyo bukkewa mogo ma itwero miyone bot ngat ma onyuto miti.

Tem Timo Man i Dwe-ni:

Cabit ki cabit temme me cako lok ki ngat acel nyo makato kun imiyo caden ma pe iyubbe iye.