“Wubed ki Kit Maber i Kin Jo ma Pe Gingeyo Lubanga”

1. Pingo pire tek ni wanyut kit maber i kare me gure madit ma bino-ni?

¹ Waywayo tam pa jo mapol i kare me gurewa madito mwaka ki mwaka, pi man pire tek ni myero wabed ki kit mabeco ma nyuto ni waworo Lubanga me ada. (Levi 20:26) Rukwa ki kitwa mabeco myero onyut ni wan jo ma gilubo kor Kricito kikome. Ka wacito pi gure madito me distrik ki gure ma kwako lobe mapol, i yo ma nining ma watwero bedo “ki kit maber i kin jo ma pe gingeyo Lubanga” wek wami deyo bot Wonwa me polo?—1 Pet. 2:12.

2. Kare maber ango ma watye kwede me nyuto kit pa Lukricitayo ka watye i gure madit?

² Wunyut Kit pa Lukricitayo: Mar ma wanyuto i kinwa ki dok kit ma watero kwede “jo ma pe guye” ada, pat mada ki cwiny me lobo-ni. (Kol. 3:10; 4:5; 2 Tem. 3:1-5) Mitte ni wabed lukica dok wadi cwinywa i kom lutic me otel ki ot cam, kadi bed peko mo tye. Myero wanyut pwoc botgi i yo mupore.

3. Lok me poyo wic ango ma kimiyo bot lunyodo, dok pingo?

³ Lunyodo myero gubed cok ki litinogi i ka gure madit, i ot cam, ki i ot buto. (Car. 29:15) Menija me ot cam acel owaco bot luot mo ni: “Wamarowu mada. Wun ki lutinowu kitwu beco dok wumwol. Lutic ducu gitye ka lok i komwu, walego ni kono wubedo kany i tum pa cabit ducu.”

4. Rukwa ki kit ma wanen kwede myero obed nining ka watye i boma me gure madit?

⁴ Ruk Mupore: I kare me gure madit, omyero warukke maber ki mwolo, ento pe walub kit cital mogo maraco muywek i lobo-ni. (1 Tem. 2:9) Kadi wa i kare ma watye ka kato woko ki otel, nyo ka namo ma peya yub ocakke nyo ka yub dong otum, myero wagwokke ki ruko bongo luriyo ma kelo lewic. Meno bimiyo wabedo ki awaka me ruko bajwa me gure madit kun wamiyo caden ka kare onen labongo lewic mo. Rukwa ki kitwa maber i kare me gure madito pe biywayo jo ma cwinygi atir me jolo kwena me larre ma tye i Baibul keken, ento bene bikelo yomcwiny bot Jehovah.—Jep. 3:17.

Lok me Poyo Wic pi Gure Madit me Distrik me 2014

◼ Cawa me Yub: Kibiyabo doggola cawa 2:00 me odiko. Yub bicakke cawa 3:20 me odiko nino adek-ki ducu. Ka dong kimiyo ngec pi cako keto wer, omyero wabedu piny wek yub ocakke i yo me woro dok ki mwolo. Wer ki lega me dolo te yub man bibedo cawa 10:55 me otyeno i Ceng Abic ki Ceng Abicel, ka dong cawa 9:50 me otyeno i Ceng Cabit.

◼ Gure ma Kwako Lobe Mapol: Kabedo mogo bibedo ki gure ma kwako lobe mapol. Iyubo gure man, jang gang kal otyeko moko kacokke mene ki wele ma gia ki woko ma myero kilwonggi, ma lubbe ki wel kabedo kacel ki otel me buto ma tye. Dano romo pong makato kare woko ka ce lutit kwena gucito i gure ma kwako lobe ducu ma pe kilwongogi iye. Ka ce mitte ni iwot i gure madit mapat ki me kacokkewu, pe omyero iyer me cito i gure ma kwako lobe mapol.

◼ Ka Gwoko Giwot: Ka ma kigwoko iye giwot maber bibedo tye i kabedo me gure ducu labongo cul mo, dok kibimiyone ma lubbe ki ngat ma okwongo bino wi ati. Kit ma kabedone tye pi giwot manok keken-ni, ber ka dano giwoto mapol i giwot acel. Lugoro keken aye kibiye ki gin me gwoko giwotgi i kabedo ma kiyubo pigi.

◼ Gwoko Kabedo: Ka dong kiyabo kabedo odiko ki odiko, tim ber pe irune ka donyo calo wutye ka pyem apyema. Bedo ki cwiny me jalle ken kun watamo pi luwotwa binyuto bot jo mukene ni wan watye Lukricitayo me ada, dok biweko gimiyo pak bot Lubanga. (Jon 13:34, 35; 1 Kor. 13:4, 5; 1 Pet. 2:12) Iromo gwoko kabedo pi jo ma wuwoto kwedgi i mutoka acel nyo jo ma wubedo kwedgi i paco acel nyo lutino kwanwu me Baibul. Kibiyubo kabedo pi jo muteggi nyo jo magoro. Dano acel nyo aryo keken ma gibikonyo ngat meno aye twero bedo kwede.

◼ Cam me Dyeceng: Tim ber ibin ki cam me dyeceng me kaka weko kagurre me cito ka cam woko i kare me yweyo me dyeceng. Ber me tic ki gin me mako cam matidi ma kiromo ketone i te kom. Jami madongo me mako cam ki dong jami ma obedo gilac pe mitte i kabedo me gure madit.

◼ Miyo Mot: Watwero nyutu pwocwa pi yub me gure ki miyo motwa pi konyo tic ma mako wi lobo ducu ki i Ot me Kerwa nyo ki i gure madit. Mot ma kimiyo i kare me gure me distrik kun kitiyo ki cheque, omyero kicogi i nying dulwa.

◼ Two ki Awano ma Bino Atura: Ka two mo ocakke atura i kagure madit, tim ber itit ki lajol wele mo ma tye cok kwedi, en bimiyo ngec meno cut ka ma Kimiyo iye Kony wek ngat ma tye ki ngec i miyo kony oyot onen lit pa twone kacel ki mine kony. Ka ce mitte, ngat ma tye ki ngec me miyo kony-nyi bipenyo pi kony mukene.

◼ War: Mwaka ki mwaka awano mapol timme ma lubbe ki war aruka. Ma ka ruko war mogo ma tye calo cilipa nyo cital ma pud okati nyen, ber iyer war mupore, ma romo tyeni ma weko iwoto i citep nyo i kalo bwur labongo ayela.

◼ Jami ma Ngwecgi Kur: Gure madito mogo oromo timme ki i ot ma doggi kiloro woko ma macin ma kiyo yamo aye cwalo yamo iye. Pi meno, bedo ki kica bimiyo pe watiyo ki moo nyo pafium ma ngwece tek tutwal ma twero kelo peko bot jo ma tye ki two ma mako ot yweyo ki mukene ma pe mito ngwec piny ma oculle liking—1 Jo Kor. 10:24.

◼ Fom me Lubu: Omyero wati ki fom me Please Follow Up (S-43) me miyo ngec i kom ngat mo ma onyutu miti i kare ma nongo watye ka miyo caden ma pe wayubbe pire i kare me gure. Lutit kwena myero gubin ki fom man acel nyo aryo mo i ka gure madit. Ka ipongo fom man ci iromo miyone bot Jo ma Gwoko Bukke nyo bot karan me kacokkewu ka ce idok gang

◼ Kabedo me Cam: Ket deyo i kom nying Jehovah ki bedo ki kit maber i kabedo me cam.

◼ Kabedo me Buto:

Pe iwek kigwok ot buto mapol ma pe ibiromo tic kwedgi ducu, dok pe iwek wel dano gukat wel ma mitte me buto i ot moni.
Gwokke pe me kwero ot buto ma onongo kigwoki nikwanyo ka peko mo obino atura, ci mi ngecce bot wegi ot labongo galle.—Mat. 5:37.
Bed ki ngec ni ka ce ibitic ki credit card ka itye ka culo pi otel, tye macalo cik ni wegi otel “gibigwoko” credit card meno pi tic ki cente ma iye me culo pi jami ducu ma itiyo kwede, kacel ki jami mogo ma nongo oballe i kare ma ibedo i otel. Pe ibitic ki cente meno nio wa i nino ma ibia iye ka ityeko cul ducu me otel.
Kwany lating ter pa wegi otel ka ce ibitiyo kwede keken, dok omyero idwok woko oyotoyot wek jo mukene bene guti kwede.
Ted i ot ma kiye tedo iye keken.
Bed ki kit ma cwiny maleng nyako ka itye ka lok ki jo ma gitiyo i kabedo ma ibuto iye. Gitye ka gwoko welle mapol dok gipwoyo ka ce wanyutu cwiny me kica, diyo cwiny, ki dong niang.
Lunyodo myero gugwok lutinogi maber kare ducu ka gitye i kabedo mapatpat me otel calo ka kwang, ka namo, nyo ka rweyo kom-gu.
Ka peko mo ocakke ki ka ma ibuto iye, nen ni iniango Jo ma Neno Lok kom Kabuto i gure wek inong kony mo.

◼ Jo ma Mito Mine me Tic: Ngatti mo keken ma mito mine myero ocit i Dipatmen ma Loyo Lok me Mine me Tic i kabedo me gure (Volunteer Service Department). Lutino ma pud pe gitye ki mwaka 16 giromo bene miyo kony kun nongo gitiyo kacel ki lunyodogi, ngat ma gwokogi nyo dano mo madit ma gin gucimo.