Jami Mutimme i Lobe Mapatpat
◼ Australia: John, laco mo mukwano matek, onongo cito i kanica i kare ma pud latin ento lacen odoko ngat ma pe ye i kom Lubanga. Painia mo oweko bote brocuwa me Was Life Created? ci lacen dok oweko brocuwa me Origin of Life. Painia man omedde ki dongo mitine ki kelo bote magajin ma pud okati nyen kun nyute pwony ma kwako cwec nyo lok pa lunebi me Baibul. I kare ma otamo ni John dong tye atera, omiyo bote buk me The Bible—God’s Word or Man’s? I nge kwanone, Jon owacci olo dong etwero ye ni Lubanga tye. Ci painia man omiyo bot John buk me Baibul Pwonyo, onyute paragraf 8 i pot karatac 20 ki paragraf 13-16 i pot karatac 23-24. Wang Baibul ma kicimogi kenyo ogudo cwiny John adada mumiyo en owacci, “Nen calo atye atera me kwano Baibul doki.”
◼ Mexico: Laco mo owaco ki latit kwena ni en pe eye ni Lubanga aye omiyo kicoyo Baibul. Latit kwena-ni owacci etwero nyute gin ma nyuto ni Lubanga aye omiyo kicoyo Baibul. I nge nyamo lok tyen mapol, gin ma laco-ni obedo ka pwonyo ki i Baibul ogudo cwinye. Pwonyo lok i kom cik pa Lubanga ogudo cwinye adada. En owaco bot latit kwena-ni ni: “I kare ma wacako kwano Baibul kacel, onongo tye calo tam ma oa ki i buk mo keken ci pe ogudo cwinya. Ento kombeddi dong ka wakwano lokke, tutwalle i kom cik ma kwako kit matir, cwinya rem adada.”
◼ Amerika: I kare ma luot moni onongo gitye ka nywako i yub ma kite dok pat me miyo caden i boma madito, gurwatte ki dako mo me lobo Taiwan ma ye i kom Lubanga ento tamo ni Baibul obedo buk pa Muno. En obino i meja ka ma kicano iye bukkewa pien onongo winyo calo ngat ma orwenyo woko kadi bed ni etye ki kwo maber. Onongo tye ki gen ni Baibul twero konye me nongo kwo ma tyen lokke tye. Luot-ti gucako kwan kwede kun gitiyo ki buk me Baibul Pwonyo kacel ki brocuwa me Lasting Peace and Happiness—How to Find Them. Ma ka cako ki kwano dul me 2 i buk man, gunyamo bute ma wiye tye ni “Buk ma Miyo Tira ki Mot Bot Dano Ducu” i brocuwa meno. I nge nyamo paragraf abicel mukwongo me bute meno, dako-ni obedo ki ur ni Baibul dok pat adada ka iporo ki bukke me dini mukene. I nge nyamo lok pa lunebi mogo me Baibul ma ocobbe kakare, en owacci, “Pe atamo ni tye dok buk mukene ma lokke tye kakare calo Baibul!”
◼ Japan: Kadi bed rwod ot mo owaco bot latit kwena acel ni en pe eye i kom Lubanga, latit kwena-ni omedde ki limme, kun nywako kwede pwony me Awake! ma wiye tye ni “Kiyubo Mono Ayuba?” Mot mot, laco-ni oloko tamme ci ocako wacci Lacwec romo bedo tye. Kombeddi dong laco-ni ye ni Lubanga tye, dok latit kwena-ni tye ka kwan kwede kun tiyo ki brocuwa me Kwena Maber Mua ki bot Lubanga!
◼ Canada: Lamego mo omiyo magajin ma pud okatti nyen bot dako mo ma tye ka a ki i ode me cito i mutokane. I kare ma laminwa odok cen bote, dako-ni owacce atir ni pe etye ki miti dok pe eye i kom Lubanga. Lamego-ni pe oilo cinge ento okele brocuwa me A Satisfying Life—How to Attain It. I kare ma lamego-ni onongo dako-ni paco, owacce ni kadi bed engeyo ni dako-ni pe ye i kom Lubanga, ento ebedo ka tam i kome pien eniang ni en tye lanyodo acel keken. En onyuto ki dako-ni paragraf 6 i pot karatac 4 me brocuwa man, ma loko i kom kit me nongo tira maber. En bene ocuko cwiny dako-ni me kwano tam ma kimiyo i pwony me 2 i kom kit me pito lutino. Dako-ni cwinye obedo yom adada me gamo brocuwa man.