Omege Matino, Tika Wutye ka Mine pi Tic?
1. Awene ma omego ma pud tidi myero oket i tic tira ma tye i 1 Temceo 3:1?
1 “Ka ce dano mo mito tic . . . , pa Lubanga, nongo en mito tic maber.” (1 Tem. 3:1) Lok meno cuko cwiny omege me mine pi tic i kacokke. Myero mono mwakani obed dit wek imine pi tic meno? Ber gire me mine ma pud itye bulu. Man bimiyo inongo pwony dok inyuto ni lok mo marac pe i komi, ci kitwero cimmi me bedo lakony kor tic lacen. (1 Tem. 3:10) Ka ibedo omego ma pud tidi ma dong onongo batija woko, itwero mine pi tic nining?
2. Waromo dongo cwiny me jalle ken nining?
2 Jalle Ken: Wi opo ni itye ka mito tiyo tic maber, pe yenyo dog tic onyo rwom ma lamal. Pi man, dong miti me konyo omege ki lumege. Yo acel ma iromo timo kwede man obedo lwodo lanen pa Yecu. (Mat. 20:28; Jon 4:6, 7; 13:4, 5) Leg bot Jehovah wek okonyi me dongo miti me paro pi jo mukene. (1 Kor. 10:24) Tika itwero miyo kony ma mitte bot jo me kacokke ma gutii ki ma gigoro? Tika imine me jwero piny, nyo timo tic mukene ma kwako gwoko lengo i Ot me Ker? Tika itye atera me miyo pwony i cukul me tiokraci ka ce ngat ma myero omi pwony meno nongo peke? Ibinongo ni mine me tic pi jo mukene keli yomcwiny madwong—Tic 20:35.
3. Bedo ki wat maber ki Jehovah pire tek lakwene dok itwero dongo wat kwede nining?
3 Watti ki Jehovah: Pire tek mada pi lakony kor tic me kacokke me bedo ki wat macok ki Lubanga ma ka bedo ki diro moni ma kinywali kwede. Dano ma tye ki wat macok ki Jehovah tute me neno jami kit ma Jehovah ki Yecu gineno kwede. (1 Kor. 2:15, 16) En myero onyut “nyig ma nyak pi cwiny maleng.” (Gal. 5:22, 23) En latit kwena ma tiyo ki mit kom, dok keto pi Ker-ri bedo mukwongo. (Mat. 6:33) Itwero dong i yo me cwiny ka iketo yub me kwano Baibul piri keni kare ki kare. Man kwako kwano Baibul nino ducu, kwano magajin me Wi Lubele ki Awake! ducu ma katti nyen, ki dong yubbe maber ki bedo tye i cokke. (Jab. 1:1, 2; Ibru. 10:24, 25) I kare ma tye ka cuko cwiny Temceo me dongo i yo me cwiny, Paulo ocoyo bote ni: ‘Myero igwok pwonnyi.’ (1 Tem. 4:15, 16) Ka kimini pwony i Cukul me Tiokraci, yub maber. Yubbe pi tic me pwony, dok inywak iye kare ki kare. Ket yub me cwiny calo bedo painia, cito i Betel, nyo i Cukul me Baibul pa Omege ma Wigi Nono. Bedo ma ijing i yo me cwiny bikonyi me weko “miti me awobe obedi.”—2 Tem. 2:22.
4. Bedo ngat ma kite atir dok ma genne pire tek pingo?
4 Bed Ngat ma Kite Atir dok ma Genne: Kit macalo omege ma kimiyogi tic me poko cam bot Lukricitayo ma gitye ki peko i cencwari me acel kiyero jo ma “giloko nyinggi maber” ma kingeyo ni gubedo jo ma kitgi atir dok gin lugen, Lukwena pe gubedo ki akalakala mo ka tic man bicobbe maber nyo pe. Man oweko lukwena guketo tamgi i timo tic ma pigi tego. (Tic 6:1-4) Pi man ka kimini tic me atima i kacokke, ti ki teko-ni ducu. Lub lanen pa Nua ma olubo kikore ticce ducu ma kimiye me payo yeya. (Acak. 6:22) Bedo ngat ma genne obedo mot madit i wang Jehovah dok nyuto ni wan wabedo jo muteggi i yo me cwiny dok watye ki wat macok ki Jehovah.—1 Kor. 4:2; nen bok ma wi lokke tye ni “Adwogi Maber ma Bino pi Pwony.”
5. Pingo mitte ni omege matino gumine i tic me kacokke?
5 Kit ma kitito i lok pa lunebi, Jehovah tye ka ruyo medde pa wel jone. (Ic. 60:22) Cokcok dano 250,000 ginongo batija mwaka ki mwaka. Pien jo mapol gitye ka bino i ada, co mupore gimitte me tiyo tic i kacokke. Kombeddi tic pa Jehovah dong odoko dwong loyo tic mukato angec (1 Kor. 15:58) Omege matino, tika wutye ka mine pi tic? Ka kumeno, nongo itye ka mito tic maber!
[Boro buk i pot karatac 2]
Pien jo mapol gitye ka bino i ada, co mupore gimitte me tiyo tic i kacokke
[Bok i pot karatac 3]
Adwogi Maber ma Bino pi Nongo Pwony
Omege matino ma gupore pi tic ginongo adwogi maber ka luelda guminigi tic kun gipwonyogi. I nge cokke mo acel, laneno me adwol onongo obedo i wi abam kun woto ki cuko cwiny latit kwena. En oneno awobi mo matidi ocung cok kwedgi ci openye ka gwok mito lok kwede. Omego matidi meno ogamo ni kimiye tic me gwoko lengo me wi abam i nge cokke ducu. Lunyodone onongo gitye ka kuro en, ento en onongo mito kong tyeko ticce ma peya ocito. Laneno me adwol oa oweko wi abam ki yomcwiny. En owacci: “Luelda me kacokke meno onongo tye atera me pwonyo omege matino ki miyo botgi tic me atima i kacokke. Pi meno, i kare ma abedo ka limo kacokkegi, onongo pol kare gimiyo nying omego matino pi tic me bedo lukony kor tic i kacokke.”