Wulub Lanen pa Lunebi—Joel
1. Watwero lubo lanen me mwolo pa Joel ka watye i tic me pwony nining?
1 Lanebi Joel mono obedo anga? En otito keken ni ebedo “wod pa Petuel.” (Joel 1:1) Lanebi mamwol man oketo cwinye tutwalle i kom kwena pa Jehovah, ento pe i ticce calo lakwena. I yo acel-lu, ma ka yenyo yweka piwa kenwa, wan bene waketo deyo i kom Jehovah kun watiyo ki Baibul i ticwa me pwony. (1 Kor. 9:16; 2 Kor. 3:5) Medo i kom meno wanongo teko i kwena ma watito. Lok pa lanebi Joel mene ma tugo cwinywa ki mit kom kacel ki gen i kareni?
2. Kit ma nino pa Jehovah dong tye cok-ki, myero otug cwinywa me timo ngo?
2 ‘Nino pa Jehovah Dong Tye Cok’(Joel 1:15): Kadi bed ni lok man kicoyo mwaki milion mapol ata, dong watye ka kwo i kare me cobbene. Balle pa lobo, miti manok, ki cac pa dano ma warwatte kwedgi i wang ticwa, ducu ginyuto ni watye ka kwo i kare me agikki me lobo marac-ci. (2 Tem. 3:1-5; 2 Pet. 3:3, 4) Ka waketo cwinywa i kom cok pa nino meno, ci wabibedo ki tyen lok me keto tic me pwony bedo mukwongo i kwowa.—2 Pet. 3:11, 12.
3. Pingo tic me pwony pire tek mada i kareni ma watye cok ki twon can madit atika-ni?
3 “[Jehovah] Aye ka Larre pa Jone.” (Joel 3:16): Yeng-nge pa polo ki lobo ma kiloko pire-ni cung pi ngolo kop pa Jehovah i kare me twon can madit atika-ni. Cuko cwinywa me ngeyo ni Jehovah bilaro jo ma gin lugen i kare meno. (Yabo 7:9, 14) Ka wamedde ki tito kwena dok waneno kit ma Jehovah gwokowa ki jingowa kwede, wadongo niye ki diyo cwiny ma bikonyowa i kare me twon can madit atika-ni.
4. Pingo watwero bedo ki yomcwiny kun waneno anyimwa ki gen?
4 Kadi bed ni jo mukene giwaco ni lok pa lanebi Joel turo cwiny, ento kwenane miyo bot jo pa Lubanga gen me nongo larre. (Joel 2:32) Dong myero wanen anyimwa ki gen, kun watito kwena maber me Ker pa Lubanga dok walubo lok ma i Joel 2:23 ma wacci: “Cwinywu obed yom i kom [Jehovah] Lubangawu.”