Kare me Pako Jehovah Omedde
1. Yub manyen ango ma bikonyowa me ‘miyo pwoc bot Jehovah?’
1 I dwe me Marci mukato-ni, kiketo yub manyen ma miyo ki lutit kwena kare me tic calo painia pi tutunu pi cawa 30 i dwe me Marci ki April, ki doki i dwe me lim pa laneno me adwol. Ka cabit me lim pa laneno me adwol opoto i kin dwe aryo, ci latit kwena ma mito tic calo painia pi tutunu twero yero dwe mene i kin aryo-ni ma en bitic iye pi cawa 30. Jo ducu ma gibitic calo painia pi tutunu gibibedo i cokke pa painia marii ki painia keken, ma bedo ki laneno me adwol cakke ki i acakkine nio wa i tumme. Man te lokke ni kadi bed pe watwero tic pi cawa 50, pud watwero ‘miyo pwoc bot Jehovah’ macalo painia pi tutunu tyen angwen i mwaka acel pi yub me tic pi cawa 30!—Jab. 109:30; 119:171.
2. Jo ma gibitic calo painia pi tutunu i kare me lim pa laneno me adwol gibinongo mot ango?
2 I Kare me Lim pa Laneno me Adwol: Dong, dano mapol gitwero tic calo painia pi tutunu i dwe me lim pa laneno me adwol kun ginongo kare me cuko cwiny pi tic kacel kwede i tito kwena. (Rom. 1:11, 12) Pol pa painia pi tutunu gibiketo yub me kwanyo nino acel mo i cabit meno wek ginong kare me tic ki laneno me adwol. Jo ma gitiyo cakke i Ceng Baraja nio wa i Ceng Abic giromo penyo laneno me adwol ka gitwero tic kwede i Ceng Abicel nyo Ceng Cabit. Medo i kom meno, pud dong bicuko cwiny painia pi tutunu me bedo tye i cokke pa laneno ki painia marii ki painia keken ya!
3. Pingo kare me Nipo obedo kare maber mada me tic macalo painia pi tutunu?
3 I Dwe me Marci ki April: Jo ma kong yam gutiyo macalo painia pi tutunu pi cawa 30 i dwe me Nipo dong gitwero medo “gitum ma gityero”! (Ibru 13:15) Dwe me Marci ki April gubedo kare maber mada me medo ticwa macalo painia pi tutunu. Mwaka ki mwaka i kare meno, wanywako i rwec mamit atika me lwongo dano pi kwer me Nipo. Medo i kom meno, ka wamedo ticwa i kare me Nipo, watwero tic ki lutit kwena mapatpat. I nge kwer me Nipo, wadok cen ka limo jo ma gunyuto miti dok gubedo tye, ci watugo mitigi me bino i pwony ma kite dok pat ma kibimiyone. Cwinyi mono bitugge me tic ki kare ma kimedo-ni macalo painia pi tutunu?—Luka 6:45.