Ngo ma Tugo Cwinywa me Tito Kwena?
1. Kubbe ango ma tye i kin mar ki ticwa me pwony?
1 Tito kwena me Ker pa Lubanga obedo tic ma dong pire tek loyo ma watwero timone i kareni. Adada, ki tic man, wanyuto ni watye ka lubo cik aryo ma pigi tego loyo, ma gin aye, maro Jehovah ki maro luwotwa. (Mar. 12:29-31) Mar obedo teko ma tugo cwinywa i tic me pwony.—1 Jon 5:3.
2. I yo ango ma ticwa me tito kwena nyuto mar pi Jehovah?
2 Maro Jehovah: Maro Jehovah, ma en aye lawotwa macok loyo-ni, miyo waloko pire. Catan obedo ka loko lok goba i kom Jehovah pi mwaki ma romo 6,000 kulu. (2 Kor. 4:3, 4) Pi meno, dano giye ni Lubanga pwodo lubalo ki wangogi i mac me kapiny, Lubanga obedo Triniti ma niang kite tek, dok pe maro dano. Jo mukene dong giwacci Lubanga peke. Pud dong wamito ni dano gunge lok me ada i kom Wonwa me polo ya! Tutewa matek me bedo lucadenne kelo bote yomcwiny dok cwero cwiny Catan.—Car. 27:11; Ibru 13:15, 16.
3. I yo ango ma ticwa me pwony nyuto mar pi dano luwotwa?
3 Mar pi Lawoti: Kare ducu ka watye ka miyo caden bot dano mo, nongo wanyuto marwa pire. Pol pa dano gitye ka yenyo lok me kwena maber i kare man ma kwo tek-ki. Jo mapol gitye calo jo me Nineve me kare pa Yona ma onongo “pe gingeyo poko kin cinggi ma lacuc ki ma lacam.” (Yona 4:11) Ticwa me pwony-nyi pwonyo dano kit me kwo maber ki yomcwiny. (Ic. 48:17-19) Miyogi gen. (Rom. 15:4) Ka guwinyo lokke dok guketo i tic, ci “gibilarogi.”—Rom. 10:13, 14.
4. Ngo ma wi Jehovah pe biwil iye?
4 Lutino ma kitgi beco pe ginyuto mar pi lunyodogi i kare mogo keken. Ginyuto mar i kare ducu. I yo acel-lu, mar matek ma watye kwede pi Jehovah ki pi luwotwa miyo wabedo atera me miyo caden i kare ducu, pe i kare mogo ma wayubo me miyo caden keken. Pe wabiweko tic me pwonyo dano ki tito kwena. (Tic. 5:42) Jehovah wiye pe biwil i kom mar ma kit meno matwal.—Ibru 6:10.