Bok Me Lapeny

◼ Ngo ma omyero watim ka wamito miyo jamiwa mogo nyo ducu bot dul pa Jehovah i nge towa?

Ka dano oto, nongo en dong pe tye ki twero i kom jamine. (Latit. 9:5, 6) Pi meno, jo mapol gicoyo wil nyo waraga ma nyuto gin ma gimito ki kit ma jamigi omyero kipok kwede. (2 Luker 20:1) Waraga man ma rwatte ki cik-ki bene nyuto anga ma igeno ma romo gwoko nyo poko jamini. I lobe mapol, ka pe kicoyo waraga man, gamente aye bimoko kit me poko jami pa lato man. Pi man, ka wamito miyo jami ma watye kwede ducu nyo mukene bot dul pa Jehovah, pire tek ni waco waraga ma nyuto mitiwa dok wayer ngat ma bibedo lagwok ki lapok jami magi.

Lagwok nyo lapok jami tye ki tic matek atika. Ma lubbe ki wel lonyone, guro ki poko jami magi ducu kwako bedo ki ngec i komgi kore ki kore dok twero cwalo cawa malac. Medo i kom meno, luloc me gamente pol kare gitye ki cik ma omyero kilub. Pe dong tye ni ngat mo keken me kacokke twero bedo lagwok nyo lapok jami pa lato. Ngat ma wayero-ni myero obed ngat ma tye ki ngec, genne, dok ye me lubo tam ma wamiyo bote.​—Nen pwony ma wiye tye ni “Ryeko ki Adwogi Maber me Yubo Jamini ma Peya Ito,” i Awake! me Decemba 8, 1998.

Ka Kilegi ni Ibed Lagwok nyo Lapok Jami pa Lato: Ka kilegi ni ibed lagwok nyo lapok jami pa ngat moni i nge tone, myero kong inen ni itye ki ngec me cobo tic meno maber, dok iket i lega. (Luka 14:28-32) Ka dong dano-nu oto woko, myero iniang jo ducu ma kiryeyo nyinggi pi nongo jami pa lato. Ka dong inongo twero me timo meno, ticci bibedo me poko jami kun ilubo cik ki wil ma lato-ni ocoyo. Lagwok nyo lapok jami myero onge ni kadi bed jami pa lato tye manok nyo pol, en myero olub jami ma kicoyo piny i wil. Mot mo keken ma kiweko i nying ma Lucaden pa Jehovah cone kwede i te gamente me lobo moni obedo cente pa dul pa Jehovah.​—Luka 16:10; 21:1-4.