Wan Pe Waweko Ticwa
1. Wan wangeyo nining ni lutit kwena me cencwari me acel pe guweko ticgi pi kare mo?
1 Lutit kwena me cencwari me acel ma komgi mit gutito kwena maber ka mo keken ma dano twero nonge iye ‘labongo wekone.’ (Tic 5:42) Dong pe watwero tamone ni ka nongo gitye ka wot i ot ki ot ci giwoto gikato dano i wanga yo labongo tito kwena botgi bene. Dok gin onongo pe giweko kare ma ononge me miyo caden ma pe guyubbe iye kato ka gitye ka wil i cuk i nge tyeko ticgi me pwony. Calo Yecu, gin onongo pe giweko ticgi pi kare mo.—Mar. 6:31-34.
2. Kwo ma lubbe ki nyingwa kwako ngo?
2 Kare Ducu Nongo Watye Atera: Nyingwa ni, Lucaden pa Jehovah, pe tito gin ma watimo keken; ento tito jo ma wan wabedo. (Ic. 43:10-12) Dong wan watye atera me lok pi genwa, kadi ka pe watye ka wot i ot ki ot. (1 Pet. 3:15) Tika in itamo pi gin ma romo ngolle ma miyo itwero miyo caden ma pe iyubbe iye ki dong tamo i kom ngo ma itwero wacone? Tika igwoko gin akwanawa pi tic kwede bot jo ma nyuto miti? (Car. 21:5) In ipwonyo i ot ki ot keken, nyo itito kwena bot dano i kit mukene teke ka kare ongolle?
3. Pingo “yo mukene” pe obedo leb maber me lok i kom pwony i teng gudu, bac pak, i ka timo biacara ki i kabedo mukene?
3 Pe Obedo “Yo Mukene” me Miyo Caden: I kare ma okato angec wabedo ka tic ki lok ni “yo mukene” me lok i kom pwony i teng gudu, bac pak, kabedo me biacara ki kabedo mukene. Ento, lok ni “yo mukene” romo miyo dano niang ni tic ma kit meno pe obedo tic ma jwi, nyo obedo ma itimo ka cwinyi mito. Lakwena Paulo owaco ni en epwonyo “i dye lwak” ki i ot ki ot. (Tic 20:20) Dong, lwongone ni miyo caden “i dye lwak” obedo leb maber makato lwongone ni “yo mukene” me miyo caden. Obedo lok ada ni pwony i ot ki ot bimedde ki bedo yowa me acel dok ma tiyo tutwal me miyo ngec me kwena maber me Ker-ri bot dano. Ento, lutit kwena me cencwari me acel guketo cwinygi i kom dano, pe i kom odi. Gutiyo ki kare ducu ma onen me lok i kom lok me ada—i dye lwak, ma pe guyubbe iye, ki i ot ki ot. Wabedu wunu ki tam acel-lu pi cobo ticwa me pwony kakare.—2 Tem. 4:5.