Tika Itwero Nywako i Tic me Pwony i Ceng Cabit Ducu?

1. Gin ango ma watwero pwonyone ki i tic pa Paulo ki lureme i kare ma gitye i Pilipi?

¹ Onongo obedo Cabat, nino ma pol pa Lujudaya me Pilipi giywe iye. Paulo kacel ki lureme onongo gitye ka limo boma meno i wotte macalo lamiconari. Ngat mo pe onongo twero lok i komgi marac, ka ce gukwanyo kare mo me yweyo ki i ticgi me tito kwena i nino meno. Ento, onongo gingeyo ni Lujudaya gigure kacel i nge boma-nu ka lega, ci dong gutiyo ki kare meno me tito kwena botgi. Paulo ki lureme pud dong gubedo ki yomcwiny i kare ma Ludia ki jo me ode ducu gunongo batija! (Tic 16:13-15) Kit ma pol pa dano pe gitiyo i Ceng Cabit, pingo pe iti ki but nino man me tito kwena botgi?

2. Lweny ango ma jo pa Jehovah guloyo mumiyo dong gitye agonya me tito kwena i Ceng Cabit?

² Lweny pi Tito Lok me Kwena i Ceng Cabit: I mwaka 1927, kicuko cwiny jo pa Jehovah me tero cawa malac i tic me pwony i Ceng Cabit. Man otugo aunauna cutcut. I Amerika kimako lutit kwena mapol ni gin gitye ka turo cik me Cabat, balo kuc pa dano, ki cato cat labongo lancic. Ento jo pa Jehovah pe gujuko tic man. I kin mwaka 1930 “gurup mapat pat guribbe kacel i tic me rwec,” ka ma lutit kwena me kacokke murumo wang tic moni girwatte ka dong gitiyo i kabedo meno kacel. I kare ma kimako lutit kwena mogo, onongo welgi tye dwong tutwal ma dok ongayo luloc woko. In tika itye ki pwoc pi yelle pa omege magi mumiyo wan bene dong watye agonya me tito kwena i Ceng Cabit?

3. Ngo ma weko Ceng Cabit bedo nino maber me nywako i tic me pwony?

³ Nino Maber Loyo pi Tito Kwena: I Ceng Cabit jo mapol pe gitiyo. Pol kare nongo gitye gang ka yweyo mot. Jo mukene ma giwire i kanica giromo bedo ki miti me nywako lok i kom Lubanga i nino meno. Ka cokkewa bedo i Ceng Cabit, nongo watye ma warukke mupore me wot i tic me pwony, dong pingo pe iket yub me tic meno wiati nyo inge cokke? Ka mitte, wot ki ginacama mo manok.

4. Waromo bedo ki yomcwiny ango ka watiyo ki but Ceng Cabit i tic me pwony?

⁴ Ka watiyo ki but nino me Ceng Cabit i tic me pwony, pud nongo watye ki kare me yweyo ma wamito-ni. Dong man bimedo yengo ma bino pi timo tic maleng. (Car. 19:23) Waromo bedo ki yomcwiny me nongo ngat ma tye ki miti calo Ludia!