Tic ma Pud Dong Yomo Cwiny Loyo
1. Tic ango me cango dano i yo me cwiny ma tye ka timme i kare man?
1 Yomcwiny madit opongo cwiny jo ma guneno kit ma kicango kwede dano i yo me aura i cencwari me acel. (Luka 5:24-26) I karewa-ni, wanongo yomcwiny i tiyo tic me konyo dano wek gunge Jehovah. (Yabo 22:1, 2, 17) Pud dong yomo cwinywa ya me kwano jami mutimme ma nyutu kit ma Lok pa Jehovah ki cwiny mere maleng oloko kwede kwo pa dano! Ento, gin ma kelo yomcwiny madit loyo aye nywako i tic man me kwano Baibul ki dano i yo ma weko en dongo.
2. Yomcwiny ango ma wanongo ka wapwonyo ngat mo ki lok me ada?
2 Lubanga nyinge nga? Pingo Lubanga weko dano deno can? Ker pa Lubanga bitimo gin ango pi dano? Wanongo yomcwiny pe i miyo lagam me dok i kom lapeny magi keken, ento bene ki i neno yomcwiny i wang latin kwan moni ka oniang lok ada. (Car. 15:23; Luka 24:32) Ka latin kwan woto ki dongo, en romo cako tic ki nying Jehovah, yubo kit me rukke ki kit ma en nen kwede, weko tim mogo maraco, ci dong cako tito kwena bot jo mukene. Ka en omedde ki dongo nio wa i dyere ki nongo batija ci en doko omegiwa ma latic wadiwa. Alokaloka mabeco magi kelo botwa yomcwiny.—1 Tec. 2:19, 20
3. Yo maber ango ma waromo tic kwede me cako kwano Baibul ki dano?
3 In Bene Ibinywako Iye? Ka imito nywako i tic ma kelo yomcwiny-nyi, kwa Jehovah wek omini mot me kwano Baibul ki ngat mo, kun itiyo ma lubbe ki legani. (1 Jon 5:14) Tit lok me kwena i cawa ki i kabedo ma dano nonge iye. Cak kwano Baibul ki dano tekke kare mo onen. (Latit. 11:6) Ka inongo ngat ma tye ki miti ci icoyo kodi me lok ada, dok cen ka onyo pii iye.—1 Kor. 3:6-9
4. Pingo omyero wamine me kwano Baibul ki dano ki ngec ni kare dong odic woko?
4 Dano mapol ata pud gitye ma kec ki orwo pii nekogi pi bedo jo ma kitgi atir. Anga ma bikonyogi me cobo mitigi me ngeyo Jehovah kun kwano Baibul kwedgi? (Mat. 5:3, 6) Dong, omyero wamine ki cwinywa ducu me konyo cobo tic me tito kwena ki me pwony-nyi ma kare me kac pud peya ogik. —Ic. 6:8.