Ti Kwede i Kare ma Onen Ducu
1. Trak me Ngeyo Lok Ada konyo me timo ngo?
1 Trak me In Imito Ngeyo Lok Ada? kiyubo pi konyowa me cako kwano Baibul ki dano. Ento trak man bene obedo gin ma pire tek ma watwero tic kwede me poko kodi me lok ada. (Latit. 11:6) Magi aye tam mogo ma kimiyo ma twero konyowa me tic kwede maber.
2. Wan watwero cako lok kun watiyo ki trak-ki nining?
2 Cako Lok: Iromo miyo trak man bot rwod ot, nyut lapeny abicel ma tye i pok ngeye ci peny ni: “I kin lapeny magi, mene ma ibedo ka pennye kwede?” I nge nongo lagamme, wunyam lagam ma a ki i Baibul me lapeny acel pa rwod ot kun itiyo ki trak man dok ikwan ginacoya acel ma kicimo. Kwan nyo lok wiye wiye i kom lok ma tye i pot karatac me tung ngeye, ci imi buk me Baibul Pwonyo. Kadi bed en pe oye buk meno, en nongo dong ogamo trak-ki ma twero miyo lwit lok me ada moko i cwinye.—Mat. 13:23.
3. Ngo ma waromo timone ka rwod ot tye ki tic mapol?
3 Ka Rwod Ot Tye ki Tic Mapol: Iromo wacci: “Kit ma man pe obedo cawa maber-ri, wek aweki trak man. Trak-ki oryeyo lapeny abicel ma pol pa wan wamaro penyone dok miyo lagam i kom lapeny acel acel kun a atir ki i Baibul. Ka nino mo wanen doki, ci wek ange tammi i iye.”
4. Ngo ma waromo wacone ka watye ka miyo trak i teng gudu?
4 Ka Itye ka Tic i Teng Gudu: Itwero wacci: “In tika dong yam ipenye ki lapeny acel i kin magi? [Mine kare wek ogam.] Trak man miyo lagam me yengo ma nonge i Baibul.” Ka ngat meno pe tye i wi aruya, ci wuromo nyamo lapeny acel ki i kin mogo ma gitye i trak meno kun imiyo buk me Baibul Pwonyo.
5. I kare mogo watiyo ki trak man i paci ma nongo dano gipe iye nining?
5 Jo ma Pe Paco: I wang tic mogo, lutit kwena pol kare giweko jami akwana ka ma pe nen i paci pa jo ma nongo gipe paco. Ka man obedo gin ma timme i kacokkewu, ci pingo pe iwek trak me Ngeyo Lok Ada? Ka idok cen iromo wacci: “I kare ma wabino kany i nino moni, in onongo ipe paco, ci waweko trak man i te doggolani. Lapeny mene ki i kin magi ma imito ni wagam?”
6. Ngo ma weko trak me Ngeyo Lok Ada obedo gin maber tutwal me pwony?
6 Trak me Ngeyo Lok Ada man pwonyo ada i yo mayot, ma pe nyweno wi dano. Gudu cwiny dano me dini ki rok ducu. Tic kwede yot; lutit kwena manyen wa ki matino ducu gitwero tic kwede. In tika itiyo kwede i kare ma onen ducu?