Bok Me Lapeny

◼ Wan Watwero Konyo Painia i Yo ma Nen Nining?

I wi lobo ducu i mwaka me ticwa me 2009, cokcok omego ki lumego 800,000 gutiyo calo painia marii ki dok painia keken. Lutic pi kare malac magi gujalo kare, kero, ki jamigi pi tero kwena maber. (Car. 3:9) Cwiny Jehovah myero obed ni tye mayom pi yellegi mada! I yo ango ma watwero nyuto kwede neno pa Jehovah kun wakonyogi me nongo yomcwiny ki me diyo cwinygi i tic calo painia?

Lok ma waloko maber twero cuko cwinygi me medde ki tic calo painia. (Car. 25:11) Tika watwero loko yub ma wabedo kwede i dye cabit wek watii kwedgi i tic me tito kwena? Ka watye ka tic kacel, waromo culo pi wotgi. (1 Kor. 13:5; Pil. 2:4) Wan bene watwero teno korgi ki lwongogi gang wek wami botgi cam.—1 Pet. 4:8, 9.

Ginacoya onyuto ni Jehovah bimiyo jami ma mitte bot jo ma giketo pi Ker-re bedo mukwongo. (Jab. 37:25; Mat. 6:33) Yo acel ma en timo kwede man en aye ni en tiyo ki Utmegiwa. (1 Jon 3:16-18) Ngene kene ni painia pe gibedo ma gingeyo ni jo mukene aye giculo pi jami ma gimito ma mito cente. Dok gin pe gikwanyo kare me niango jo mukene ka gimito gin mo. Ento wan watwero konyo painia “i cangi” i yo ma nen ki bedo ki wang ma twolo i komgi.—2 Kor. 8:14, 15.

I kare ma Foibe, latit kwena ma kome mit me kacokke me Kenkeria me cencwari me acel ocito i Roma, Paulo ocuko cwiny omege me Roma ni: “Wujole i Rwot kit macalo jo pa Lubanga myero gujol kwede dano, dok . . . wukonye i gin ducu ma en bimito ki botwu.” (Rom. 16:1, 2) I yo acel-lu, wan bene watye ki kare me teno kor jo me kacokkewa ma gitito kwena maber-ri macalo painia marii ki dok painia keken.—Tic 5:42.