An Tika Atye ka Tiyo Ticwa me Pwonyi Muromo?
1. Lakricitayo ma lagen twero bedo ki par ango?
1 Tika dong ipenye ki lapeny meno? Gwok nyo kit ma inywako kwede i ticwa me pwonyi odok piny pien ni i tii, itye ki peko me yotkom, nyo tic me gwoko jo me ot odoko pol ma weko cwinyi tur. Lamego mo ma tye ki lutino adek ocoyo ni i kine mukene cwinye ngolle kop pien ni cawa ki kero ma etiyo kwede me nongo jami ma mitte pi jo me ode pe miyo etiyo matek i ticwa me pwonyi. Ngo ma bikonyowa wek wanen jami i yo mupore?
2. Gin ango ma Jehovah mito ki botwa?
2 Gin ma Jehovah Mito ki Botwa: Ngene kene ni wan ducu wamito ni wacwal cawa malac i ticwa me pwonyi. Ento apokapoka tye madit i kin gin ma wamito timone ki gin ma ada watwero timone. Kit ma wamito cwalo cawa malac i ticwa me pwonyi, man nyutu ni pe wamito cobo mitiwa kenwa. Omyero wiwa opo ni Jehovah ngeyo gorowa maber adada dok pe mito ni watim gin mo ma pe watwero. (Jab. 103:13, 14) Gin ango ma en mito ki botwa? En mito ni wati pire ki cwinywa ducu, kun wamiye gin maber loyo.—Kol. 3:23.
3. Watwero ngiyo kerowa ma wamiyo i ticwa me pwonyi nining?
3 Gin ango ma bikonyowa me moko ngo maber piwa? Watwero penyo Jehovah wek okonywa me neno kit me kwowa i yo ma atir. (Jab. 26:2) Larem muteggi dok ma genne ma ngeyowa maber ma bene pe lwor me wacciwa ka ma myero wayub i kwowa twero konyowa. (Car. 27:9) Wi bene myero opo ni pien kit me kwo lokke, ber ka wangiyo kwowa kare ki kare.—Ep. 5:10.
4. Omyero wanen lok me poyo wic ma a ki i Baibul ma lubbe ki ticwa me pwonyi nining?
4 Kit me Neno Lok me Poyo Wic: Ka kitye i pyem ngwec, luneno pol kare gidange me cuko cwiny lungwec. Man pe me balo cwinygi, ento me konyogi wek gunong mic inge tyeko ngwecgi. I yo acel-lu bene, lok me cuko cwiny ki me poyo wic ma a ki i Baibul ma kimiyogi i cokkewa kacel ki i bukkewa pi ‘cung matek i tito kwena-ni’ ber piwa, ento pe tere ni wape ka keto kero muromo. (2 Tem. 4:2) Watwero bedo ki gen ni ka watute ki kerowa ducu, ci Jehovah wiye bipo i kom ‘marwa kacel ki ticwa.’—Ibru 6:10.