Mono Itye ki Wang ma Pe Wor?
1. Bedo ki ‘wang ma pe wor’ te lokke ngo?
1 Gin ma waciko iye wangwa gudu jami ma watimogi. Lok man ma Yecu owaco-ni: ‘Ka itye ki wang ma pe wor, ci komi kulu bibedo leng-ngi’ pud dong rwatte ya! (Mat. 6:22) Ka wangwa ‘pe wor’ kit ma Yecu owaco kwede-ni, ci wabicikone i tiyo miti pa Lubanga. Waketo pi Ker-ri bedo mukwongo dok bene pe waweko jami me kom ma pirgi pe tego dwoyo tamwa nyo tic mogo balo ticwa me pwonyi.
2. Jami ango ma twero gwenyo tamwa, ento ngo ma bikonyowa?
2 Mitte ni Wangine Kekenwa: Jami ma jo ma gicwalo kwena me cato wil giwacci wamito nyo ma jo mukene gitye kwede twero gwenyo tamwa. Ma peya wacako yele nyo wilo gin mo ma balo cawa, cente nyo kerowa, bedo ber ka kong ‘wakwano wel lim ma mitte’ kun wapenye kekenwa ni, ‘Man mono biyubo ticca pi Jehovah kece balo abala?’ (Luka 14:28; Pil. 1:9-11) Bedo bene me ryeko ka watamo kare ki kare i kom kit ma waromo dwoko kwede rwom me kwowa piny wek wamed cawa i ticwa me pwony.—2 Kor. 13:5; Ep. 5:10.
3. Pwony ango ma wanongo ki bot lamego mo ma otimo alokaloka wek edwok rwom me kwone lapiny?
3 I kare ma lamego mo ocako tic calo painia marii, en ogwoko dog ticce ma tere cawa malac kadi bed ni tic pi cawa manok onongo twero kelle cente ma romo gwokke. Ingeye en omoko tamme ni: “Pe tye ngat mo ma twero bedo opii pi ludito aryo. Ajalo jami ma amaro wek anong jami ma amito. Anongo ni jami me kom ti woko oyot dok yenyogi tyeko kerona nono.” Kit me kwone omine kare me timo alokaloka me dwoko rwom me kwone piny kun loko dog ticce wek emedde ki tic calo painia.
4. Pingo pire tek ni wabedo ki wang ma pe wor i kare ni?
4 Kit ma kare dong odic woko-ni, pire tek tutwal ni omyero wabed ki wang ma pe wor. Nino ducu ma tum nyikowa cok nino acel ki agikki me lobo man ki bene acakki me lobo manyen pa Lubanga. (1 Kor. 7:29, 31) Ka waketo cwinywa i tito lok me kwena maber-ri, ci watwero laro kwowa ki pa jo ma winyowa.—1 Tem. 4:16.