“Wubed Lyet i Cwinywu”
1. Kit ango ma omyero onen i ticwa me tito kwena?
1 Macalo Lukricitayo, pe tye but ticwa mo ma tye ocung woko. Pi meno, kicuko cwinywa ni: ‘wubed lyet i cwinywu, kun wutiyo bot Jehovah macalo luticce.’ (Rom. 12:11) Ento, tye jami mapol ma twero dwoko mit komwa pi ticwa me pwony piny. Watwero ‘bwuku mac’ me mit komwa pi tic me Ker-ri nining?—2 Tem. 1:6, 7.
2. Kubbe ango ma tye i kin Kwano Baibul piwa kenwa ki bedo ki mit kom i tic me pwony?
2 Kwano Baibul Piwa Kenwa: Latit kwena me Ker ma nyako nyige aye latit kwena ma maro cik pa Lubanga, dok weko lok adane donyo i cwinye matut. (Jab. 119:97) Ka wanongo lonyo ma tye i Baibul i kare me kwan piwa kenwa, ci man cuko cwinywa dok medo mit komwa. Mar pi Lami lok me ada man kacel ki mitiwa me nywako kwena maber-ri ki jo mukene miyo wapako Lubanga dok watuco nyinge bot dano. (Ibru 13:15) Ngene kene ni tito kwena maber-ri ki cwinywa ducu nyutu pwocwa pi kwena-nu.
3. Cwiny pa Lubanga twero konyowa i ticwa me pwony nining?
3 Leg pi Cwiny pa Lubanga: Wek ticwa me pwony onyak nyige omyero pe wajenge i kom tekowa! Mit kom me ada bino ki i nongo cwiny pa Lubanga labongo gin ma gengo. (1 Pet. 4:11) Nyikke cok bot Wang It me ‘teko madwong tutwal’ biminiwa kero me miyo caden ki tek cwiny. (Ic. 40:26, 29-31) I kare ma Paulo orwatte ki peko i ticce me pwony, en ‘olimo kony ma a ki bot Lubanga.’ (Tic. 26:21, 22) Cwiny maleng pa Jehovah twero konyowa me bedo ma lyet i ticwa me pwony ka walego pire.—Luka 11:9-13.
4. Mit kom twero kelo adwogi maber ango, dok ngo ma myero wagwokke iye?
4 Bedo ki mit kom ma lyel calo mac pi tito kwena me Ker-ri pol kare medo mit kom pa Lukricitayo luwotwa. (2 Kor. 9:2) I wang ticwa, dano giromo jolo lokwa ka watito ki yamo komwa. Ento, omyero wati ki mit kom i yo me ryeko ki dok mwolo. (Tito 3:2) I kare ducu omyero wayeny yo me nyuto woro bot rwod ot kun waworo twerone me yero gin ma en mito.
5. Cik ango me Baibul ma omyero watute me lubone?
5 Wan macalo lutit kwena me Ker-ri, myero ‘wabed lyet i cwinywa’ kare ducu. Dong wadong wunu mit kom ki kwano Baibul piwa kenwa kacel ki keto cwinywa i lega bot Jehovah, ma obedo ngat ma twero miniwa cwiny maleng matek-ki. I yo ma kit man, watwero tiyo ticwa me pwony ki mit kom pi teko pa ‘cwiny maleng ki miti me cwinywa!’—1 Tec. 1:5.