In Mono Itye ka Tic ki Buk me Reasoning?
1. Yecu gin ki lakwena Paulo gupwonyo jo mukene nining?
1 Lakwena Paulo otute matek me ‘laro lok kun tiyo ki Ginacoya.’ (Tic 17:2, 3; 18:19) I timo meno, en obedo ka lubu lanen pa Yecu ma pol kare obedo ka kwanyo lokke ki i Ginacoya kun tiyo ki lapor me konyo luwinye me niang miti pa Lubanga. (Mat. 12:1-12) Buk me Reasoning bene kiyubo me konyowa me timo en gin acel-li.
2. I yo ma nining ma waromo tic ki buk me Reasoning me yubo cako wi lokwa i yo ma gudo cwiny?
2 Yubo Kit me Cako Lok I yo ma Gudo Cwiny: Pot karatac 9-15 me buk me Reasoning tye ki kit me cako lok i yo ma tugo miti. Pwonyo kacel ki tic ki yo mapat pat me cako lok, tutwalle ka watiyo teretere i wang tic moni bimiyo kit me cako wi lokwa i tic me pwony pe bedo lakite acel keken dok man konyowa me loko pwonywa kun wacako lok i yo ma gudo cwiny. Waromo kwano lok me cako lokwa atir ki i buk man ka watye ka miyo caden ki i cim nyo ka watye ka lok ki dano ki i cim me doggola i odi ma nongo kigwoko agwoka.
3. Ngec ango ma tye i pot karatac 16-24 i buk me Reasoning ma konyowa i tic me pwony?
3 Lweny ki Jo ma Ngolo Lokwa woko: Pingo pe ibed ma itere me rwatte ki lok mogo ma kiromo wacone me ngolo lokki woko ki i wang ticwu ki kwanyo dakika mo manok me ngiyo ngec ma tye i pot karatac 16-21 i kom kit me dok i kodi lok magi ma peya icito ka tito kwena? Wegi odi mukene mono gubedo Buddhists, Hindus, Jews, nyo Cilam? Ka tye kit meno, ci ngec ma tye i pot karatac 21-24 twero bedo me kony.
4. Waromo tic ki buk me Reasoning nining ka ce lapeny nyo lok mo ma lara dwong iye okati?
4 Gamo Lapeny: Buk me Reasoning bene romo konyowa ka ce lapeny nyo lok mo ma lara dwong iye okati. Iromo waco ki ngat meno i yo ma cek ni imito nyutte gin mo me yomcwiny ma lubbe ki lok ma tye-ni ci kwany bukki me Reasoning. Kit macalo lok ma iye kiryeyo ki nukuta me alpabet-ti, yab wi lok madit ma itamo ni romo bedo ki ngec ma imito ni. Ci ngi lapeny ma kikwotogi ki coc madongo. Ka ce inen pe inongo, ci yab index ma tye i pot karatac ma tye tung i agikki. Ka ce inongo ngec ma mitte-ni, ci kwan atir ki i buk man. Ka wutye ka nyamo lok i kom ginacoya mo, ci iromo nongo gin ma imito i pot karatac 445 ka te wi lok ni, “Scriptures Often Misapplied” nyo ‘Ginacoya ma Pol Kare Kigonyo Tere Kilong.’
5. I yo mukene ango ma buk me Reasoning twero bedo me kony?
5 Ticce Mukene: Jo mukene gigwoko kopi me Reasoning buk i gang tic nyo i cukul pi konyogi gamo lapeny mogo calo, ‘Pingo pe ikwero nino madito?’ Bulu mapol gunongo ngec ma tye ka te wi lok ni “Creation” (Ginacweya) ki “Evolution” (Kwo ocakke pire kene) tye me kony tutwal i coyo ripotgi me cukul. Ibicito mono ka limo ngat mo ma two nyo ma danone me amara oto? Ngec ma tye i te wi lok ni “Encouragement” (Cuko cwiny) twero konyi me miyo cuko cwiny ma a ki i Ginacoya. Buk me Reasoning bene tye ki ngec ma konyo pi jo ma mito yubo pwonygi ki dok doro cokke me cito i tic me pwony.
6. Mitiwa myero obed ningo ka watye ka tito kwena?
6 Ka watye ka tito lok me kwena, mitiwa pe myero obed me loyo laro lok; nyo me miyo ngec keken. Wamito ni wanyam lok ki dano ki diro kun nongo watiyo ki Ginacoya. Ka watiyo maber ki buk me Reasoning, ci wabinyutu ni wan kara waketo cwinywa i pwonywa.—1 Tem. 4:16.